Siumut tunuliaqutaralugu Inatrsisartunut ilaasortat Nikolaj Jeremiassen aamma Karl-Kristian Kruse sisamanngormat unnukkut Nuummi taxartillutik ajortorujussuarmik misigisaqarput.
Uranimut akuersaannginnerup atorunnaarsinnissaanik taasinerup kingorna politikerit taakkua marluk Nuuk Taxi-mut sianerput taxa-mik piniarlutik.
Taxartartup politikerit Siumukkormiut ingerlaannavik ilisarai.
– Naatsorsuutigisimavarput eqqissisimasumik ingerlassalluta, partiimulli tunuliaqutaqarnerput aammalu ippassaq akuersaanngilluinnarnerup atorunnaarsinneqarnissaanik taasinermi pisimasoq pissutigalugu taxartartup suaartarluta isummaminik annissiffigaatigut. Ersarissorujussuuvoq taxartartoq politikkikkut uagutsinnit allaanerusumik tunuliaqutaqartoq, Nikolaj Jeremiassen oqaluttuarpoq.
Taxamik aallaannavissut taxartartup angutip - Nikolaj Jeremiassenip Karl-Kristian Krusellu tusagassiorfinnut nalunaarutimikkut oqarnera malillugu - politikerit taakkua marluk akuersaannginnerup atorunnaarsinneqarnera pillugu akerartorpai.
– Taxartartorlu isumaqataannginnerminik nassuiaaniangaarami taxa biilinit allanit sanianit aporneqangajavippoq, apunnginniassagattalu sangugami kussinermut nakkangajappugut.
Isornarluinnartoq
– Nuanneeqaaq, maanaannarlu niorusukkaluarpugut isumaqaratta biilernerput isumannaatsuunngitsoq. Malugisinnaavara biilernitsinni marluulluta pissangalluta, Nikolaj Jeremiassen oqaluttuarpoq.
Taanna oqaluttuarpoq nammineq Hans-Kristian Krusellu nalunngilluaraluaritsik politikeritut innuttaasuni akerlerineqarsinnaasarlutik.
Ajoratik sumunngarfimminnut apuukkaluarlutik taxarnerat ´isornarluinnarsimavoq´.
– Tupigusuutigaara politikeritut sulinerput pissutigalugu inuunerput ulorianartorsiortissagatsigu, pingaartumillu taxartartumit, innuttaasunik sullissilluni ingerlatsisussamit, Nikolaj Jeremiassen oqarpoq.
Politikerit Siiumukkormiut taakkua marluk tallimanngormat Nuuk Taxi attaveqarfigaat taxamik ingerlanneqarnertik maalaarutigalugu.
Nuuk Taxi-p nalunaarutiginninneq uppernarsarpaa
Nuuk Taxi-mi pisortaagallartup Erik Jensenip Sermitsiaq.AG-mut uppernarsarpaa pisimasoq pillugu nalunaarfigineqarsimallutik, maannangaarli pisimasoq pillugu annertunerusumik oqaaseqarusunngilaq.
Urarni pillugu allaaserisarpassuit atuakkit uani