Siullerpaamik: Qaqqat sisooratarsinnaanerannut nunarput nakkutilliissutitaarpoq
Nunatsinni qaqqat sisooratarsinnaanerannut nakkutilliissut Uummannaq sulluani Karrani qaqqat qajannarsinnaanerat pillugu nakkutilliisoqarnissaanik siunertaqarpoq.
Maanna inissereerpoq. Qaqqat sisooratarsinnaanerinut nakkutilliissut nunatsinni siulleq.
Karrani 2017-imi ajunaarnersuaqartumik qaqqanik sisoortoqareernerata kingorna, sumiiffimmi qaqqat arlallit suli qajannartut, Sermitsiaq.AG-p julimi oqaluttuaraa.
Tusass qaqqat allanngujuissusaasa qanoq inneranik aammalu sisoortitsinermik tassaarsuarnermillu kinguneqartumik sunniisinnaasunik nakkutilliissummik ikkussueqataasoq ilisimatitsivoq Karrani qaqqat qanorissusaannik nakkutilliisoqarnerani oqartussat ilisimasaqarnerulissasut.
Nakkutilliissutip qaqqat nunatallu nikerartarnerat nakkutigissavaa. Nunap iluani sajuppillattarnerit uuttorneqartassapput, qaqqallu sisoorlutik tassaarsuartitsinissaannut aarlerinaatit aamma naatsorsorneqartassallutik.
Tusassimi Wholesale aamma Teknikkimut Attaveqaasersuinermullu immikkoortortaqarfiup Karrani attaveqaqatigiinnermut periarfissamik ujartuinermi, aatsitassanut inatsiseqarnermullu tunngasunut Naalakkersuisoqarfik suleqatigaa.
- VSAT-imik ikkussisoqarpoq, taanna Schweizimi Geo-præventimi qitiusumik suliaqarfimmut uuttortakkanik nassiussisarpoq. VSAT-ip saniatigut seqernup kissaanit nukiliuutilimmik ujarassiuut qitiusumik atortuinik batteriinillu imaqarsinnaasumik illuaralioqataavugut qajannaatsumik. Geo-Prævent kangerloqarfimmi tassani sumiiffinni assigiinngitsuni paasissutissanik katersivoq, paasissutissallu katersorneqarput radiolinkseeqqat atorlugit, taama oqarpoq Tusassimi Senior Projektleder Jørn Jespersen.
Innuttaasut aarlerisaarneqarsinnaalissasut
Karrani qaqqanik nakkutilliissut nunatsinni siullersaavoq. Sumiiffimmi qaqqat qanoq issusaat aamma misissorneqartussanngorpoq.
Nakkutilliissut atorlugu innuttaasut siunissami aarlerisaarneqartalersinnaapput. Qaqqalli qanoq innerinut maannakkut nakkutilliissutaalereersoq, Tusass ilisimatitsivoq.
- Sulisutta avatangiisimi peqqarniissinnaasumi attaveqaateqarnerullu nalinginnaasup avaterujussuaniittumi periarfissamik taamatut ittumik iluatsitsisinnaammata tulluusimaarutigaara. Suliamut assingusunik suliarivarput Kangerlussuarmi Extreme E aammalu Qaqortup mittarfianik attaviliineq, Karranili suliaq suliaavoq aserpiami. Suleqataasimasusi tamassi sulilluarsimaqaasi, Tusassimeersoq Jørn Jespersen oqaluttuarpoq.
Piffissaq ungasinnerusoq eqqarsaatigalugu nakkutilliissutitut atortup Uummannap eqqaani ulorianartumik pisoqarsinnaanera pillugu piffissaalluarallartillugu paasissutissiisinnaanera siunertarineqarpoq, taamaalilluni pakkersimaartitsineq piffissaatillugu aallartinneqarsinnaassammat, tassalu ilimasaaruteqarnermut kalerrisaarinermullu atortunik aallartitsinerit.
Ujarassiooq namminersorlutillu oqartussani immikkut siunnersorti Eva Mätzler ilisimatitsivoq nakkutilliissummut atasoq ulorianartoqarneranik kalerrisaarisinnaasoq nalunarallartoq qaqugu atulersinnaanersoq.