Nordplusip allaffissornikkut qullersaqarfia Kalaallit Nunaanni siullerpaamik ataatsimiititsilerpat NAPA aamma Namminersorlutik Oqartussat qaaqqusisuussapput. Tamanna ataasinngornermi juunip 12-anit 15-ianut ingerlanneqassaaq, tamatumanilu ilinniartitaanerup nuttarsinnaanerullu iluanni suleqatit attuumassuteqartut Nuummi katersuutissallutik.

Nordplus, Nunani Avannarlerni Ministerit Siunnersuisoqatigiivisa ataanni suliniut, nunani avannarlerni nunanilu baltiskiusuni ilinniartitaaneq pillugu patajaallisaanermik ineriartortitsinermillu pingaarutilimmik inissisimaffeqarpoq. Programmi ilinniartitaanermi suliniutinut assigiinngitsorpassuarnut aningaasaliisarpoq tapersersuisarlunilu, matumani ilaatigut ilinniagaqarnerup nalaani paasisassarsiorluni angalanerit, ilinniarnermut atatillugu suliffimmiinnerit, attaveqaatini sammisassaqartitsinerit aamma nuttarnermut programmit neqeroorutigisarlugit, NAPA allappoq.

Piffissamut nutaamut programmi inissinneqassasoq

- Kalaallit Nunaat sivisuumik Nordplus-programmip iluani pingaarutilimmik suleqataasimavoq, Nordplus ilinniagaqarnermut tapersersuisartutut aamma kulturikkut avitseqatigiinnermik suliaqartutut ilisimaneqarpoq. Ataatsimiinneq Kalaallit Nunaata nunallu avannarliit allat aamma nunat baltiskiusut akornanni suleqatigiinneq pillugu misissuinissaannut patajaallisaanissamullu pingaarutilimmik periarfississaaq, NAPA allappoq.

Allaffissornikkut qullersaqarfiup ataatsimiititsinerani sinniisut ukiunut tulliuttunut sisamanut programmimik nutaamik pilersitsiniassapput.

Nordplusimut peqataasut tassaapput nunat avannarliit, nunat Baltikumimiittut, aamma nunat namminersorfiusut Kalaallit, Åland aamma Savalimmiut.

Nordplus ukiut tamaasa nuttarsinnaanermut, suliniutinut attaveqarfinnullu tapiissutinik 9,8 millioner eurot missaannik agguaassisarpoq.

- NAPA Nuummi ataatsimiinnermut tassunga pingaarutilimmut qaaqqusisuusinnaagami nuannaarpoq aamma ilinniartitaanermut suliassaqarfimmi patajaallisaaviginninnissaq aamma isumassarsianik misilittakkanillu avitseqatigiinnissaq qilanaaralugu. Nordplus-programmi nunatta akornanni suleqatigiinnerup siuarsaavigineranut aamma ilinniartuutitsinnut ilinniarfitsinnullu pitsaanerusumik siunissaqalersitsinissamut pingaaruteqarpoq, NAPA allappoq.