Siullerpaamik: Inuusuttuaqqanut tigummigallartitsivik ulikkaartoq

Angerlarsimaffik Isikkivimmi Sisimiuniittumi, inuusuttuaqqanut sakkortuumik inatsisinik unioqqutitsisimallutik politiinit tigummigallagassanngortinneqartunut, immikkoortortami isumannaallisakkami inissat tamarmik atorneqarput.

- Immikkoortortaq isumannaallisagaq januarimi 2014-imi pilersinneqarmalli, aatsaat siullermeertumik init tamarmik atorneqarput, Isumaginninnermut aqutsisoqarfik ilisimatitsivoq.

Piffissami kingullermi inuusuttuaqqat 18-it inorlugit ukiullit marluk, Nanortalimmi angummik 40-nik ukioqalereersimasumik toqutsisimasutut pasineqarlutik ulluni 25-ni tigummigallagassanngortinneqarput, suliarlu Kalaallit Nunaata Politiivinit suli paasiniaaffigineqarluni.

Angerlarsimaffik Isikkivimmi immikkoortortaq isumannaallisagaq inuusuttuaqqanut 15-18-it akornanni ukiulinnut, inersimasunut isertitsivik taarsiullugu, inissikkallarfittut pilersinneqarsimavoq.

Kalaallit Nunaata Politiivisa eqqartuussiviullu aalajangertarpaat immikkoortortamiinnissap sivisussusissaa.

Inissat naammapput

Naak immikkoortortaq ulikkaaraluartoq, isumaginninnermut aqutsisoqarfiup nalilerpaa inissaatigineqartut naammattut.

- Taama naliliinermi tunngavilersuutigineqarpoq immikkoortortami isumannaallisakkami inissinneqarneq sivikitsuusarmat, isumaginninnermut aqutsisoqarfik ilisimatitsivoq.

Isumaginninnermut aqutsisoqarfik ilanngullugu ilisimatitsivoq immikkut ittumik inissanik pilersitsisoqartariaqalissagaluarpat, tamanna politiit peqatigalugit nalilersorneqarumaartoq, suliap qanoq ittuunera apeqqutaatillugu.