Siullerpaamik: Danskit aningaasanut inatsisissamut isumaqatiginninniarnerannut nunarput peqataalersoq

Kalaallit folketingimut ilaasortaatitaat marluk danskit aningaasanut inatsisissamut isumaqatiginninnialerunik siullerpaamik aggersarneqarput

Kalaallit isaaniit isigalugu danskit naalakkersuisui ukiup tullianut aningaasanut inatsisissamut isumaqatiginninnialerunik oqaluttuarisaanermut attuumassuteqarluni pissaaq.

- Kalaallit Nunaat isumaqatiginninniarnermut peqataanissaanut periarfissinneqarnerput nuannaarutigeqaarput, IA-p folketingimi ilaasortaatitaa Aaja Chemnitz Larsen Sermitsiaq.AG-mut oqarpoq.

Taassuma aningaasaqarnermut ministeri Nicolai Wammen, kalaallit ilaasortat aggersarneqassasut uppernarsaasoq, ataatsimeeqatigeqqammerpaa

- Suliassaqarfippassuit isumaqatiginninniarnerni qaqikkusuppagut.

Aaja Chemnitz Larsenip folketingimiinnermini isumaqatiginninniarnernut aningaasanullu inatsisissamut isumaqatiginninniarnernut aggersarneqartalernissaq ilungersuutiginikuuaa. Ataasiakkaaraluni anguniagaq qanilliartornikuaaa.

2016-imi alloriarneq siulleq

Aleqa Hammondilu aningaasaqarnermut ministeri ataatsimeeqatiginissaanut immikkut aggersagaanissartik iluatsinnikuuaa, tassani kalaallinit kissaatigineqartut saqqummiussinnaasimavaat. Folketingimut qinersisoqannginnerani taamani statsministerip Lars Løkke Rasmussen statsministerinngoqqissaguni neriorsuisimavoq aggersagaassasut.

Nalunngisatsituut statsministerinngoqqinngilaq, maannakkulli socialdemoktatini naalakkersuisut aggersaaneq attatiinnaraat erseqqissarneqarpoq.

- Sivisuumik sulissutigisimasap isumaqatissarsiornerillu ilungersuutigisimasat inernerattut isigaara.

Politiit akissarsiaat meeqqallu sumiginnagaasimasut

Paasinarsereerpoq pingaartumik suliniutit marluk aggersarneqarnermi saqqummiunneqassasut.

- Nunatsinni politiit inissiisarfinnilu nakkutilliisut akissarsiaat qaffanneqassapput, sulianut assigiinnut akissarsiat assigiilersinniarlugit.

- Ilutigalugu nuannaarutigaara nunatsinniit maanna Danmark meeqqat sumiginnarneqartarnerannik pinaveersaartitsinissamut suliniutip qulakkeerneqarnissaanut ikiuinissaanik qinnuigigatsigut. Suliniutip taassuma aallunneranut piffissaq aamma annertooq atorpara.

Kalaallit soqutigisaasa qulakkeerneqarnissaanut sulinermut aningaasanut inatsisissamut isumaqatiginninniarnermut kisiat tunnganngilaq, aammattaarli ministeriat arlallit suleqatiginissaannut tunngavoq. Taamaammat Aaja Chemnitz Larsen sapaatit akunneri makkunani naalakkersuisut ministerii 20-suni 12-it naapissavai.

Powered by Labrador CMS