Siullermik meeqqat, innarluutillit maannalu utoqqaat...

Meeqqat Illersuisuat aamma Inuit Innarluutillit Illersuisuata akerlianik Utoqqaat Illersuisuat FN-imi isumaqatigiissummik tunngaveqassanngilaq. Illersuisoqarfinniillu marlunnit pilersinneqareersunit aningaasaliiffigineqarnera annikinnerujussuussaaq.

Akia: 800.0000 kr.

Tusarniaassutini oqaaseqaatini atuarneqarsinnaavoq, ukiup tullianut aningaasanut inatsisissami Utoqqaat illersuisuannut, Isumaginninnermut Aqutsisoqarfik Utoqqaat illersuisuanut allattoqarfimmik isumaginnittuussasoq.

Utoqqaat illersuisuannik aaqqiissummik pilersitsisoqarnissaa Atassutip ilungersuussaasa ilagaat.

Utoqqaat illersuisuata uku suliarissavai (eqikkagaq):

• Utoqqaat pisinnaatitaaffimminnik iluaquteqassagunik siunnersorneqarnissaq ilitsersorneqarnissarlu pisariaqartippaat. Suliassaqarfiit ilaanni ilanngutsitsisarnermik aalajangeeqataasarnissamillu qulakkeerinninneq immikkut ittumik amigaatigineqarput. Tamakku malitsigisaannik Utoqqaat illersuisuata suliassaqarfiit utoqqaat atugaanni ajornakusoorfiusut suussusersissavai, taakkulu politikerinut, oqartussaasunut innuttaasunullu ingerlateqqillugit.
• Pisinnaatitaaffinnut tunngatillugu utoqqaat atugaannut tunngatillugu ersarissumik ajornanngitsumillu pitsaassusilimmik siunnersorneqartarnissaat ilitsersorneqartarnissaallu qulakkiissallugu Utoqqaat illersuisuata suliassarivaa
• Utoqqaat illersuisuat nammineerluni saaffigineqarnermiluunniit kinguneranik iliuuseqarsinnaavoq. Kikkut tamarmik Utoqqaat illersuisuannut saaffiginnissinnaatitaapput. Utoqqaat salliutinneqassapput.
• Utoqqaat illersuisuata aamma utoqqaat atugaannut tunngasunik paasissutissanik ilisimasanillu siaruarterilluni, assersuutigalugu ilaqutariissutsimut, inooqatigiinnermut, peqqissutsimut, ineqarnermullu tunngasunik.
• Utoqqaat illersuisuat utoqqarnik atugaat pillugit illersuissaaq. Utoqqaat utoqqarnut attaveqarnermik pilersitsisisassaaq, taamaaliornikkut utoqqaat Utoqqaat illersuisuata sulineranut peqataalersillugit.
• Utoqqaat illersuisuata akuunera suliffeqarfimmillu saqqumilaartitsinera taassuma innutaasuni kiisalu kattuffinnut oqartussanullu tunngatillugu sunniuteqarsinnaanera ataqqineqarneralu pingaaruteqassapput.

Naalakkersuisut ataanni inissisimassaaq

Utoqqaat illersuisuat aaqqissuussaanermigut Naalakkersuisuni inissisimassaaq. Taamaalilluni illersuisoq Ombudsmandimit, aaqqissuussaanermigut Inatsisartuni inissisimasumi allaanerussaaq.

- Suliani utoqqaat soqutigisaat eqqarsaatigalugit inatsisini amigaateqartoqarnera ilisimatitsissutigineqartariaqaraangat Utoqqaat illersuisuat aamma Inatsisartut Ombudsmandiat oqaaseqarsinnaatitaapput. Suliffeqarfiit taakku suliassaqarfimminnik qalleraatilersinnaanerat ilimagineqanngilaq, tassa Inatsisartut Ombudsmandiata iluarsaasseqqinnerit annikinnerusut suliarisarmagit, kiisalu Utoqqaat illersuisuata utoqqaat soqutigisaat inatsisitigut inuiaqatigiillu tamarmiusut eqqarsaatigalugit siuarsaanermik suliaqarnerusarnera pissutigalugit, oqaaseqaatini tamanna allassimavoq.

Nipangersimasussaatitaanngitsoq

Oqaaseqaatini aamma atuarneqarsinnaavoq, eqqartuussiviit, Inatsisartut taakkulu sulliviisa pisortani oqartussat, tassunga ilanngullugit naalakkersuisoqarfiit, Naalakkersuisut aamma kommunit aalajangiiffigisaat pillugit oqaaseqarsinnaanermut Utoqqaat illersuisuat piginnaatinneqassasoq.

- Eqqartuussiviit aalajangiinerisa inatsisitigut atorneqarsinnaanerat pillugu Utoqqaat illersuisuat oqaaseqarsinnaatitaassanngilaq. Akerlianik eqqartuussiviit aalajangiinermikkut qulaajagaat pillugit pisut inatsisitigullu inissisimanerit pillugit Utoqqaat illersuisuat oqaaseqarsinnaassaaq, taama allaqqavoq.

Tusarniaanermi piffissaq 13. maj killiliunneqarsimavoq.

Inatsisissatut siunnersuummut missingiut uani takuuk