Siullermeertumik: Kalaaleq eqqumiitsuliortoq Venedigimi saqqummersitsinermi Danmark sinnerlugu peqataassaaq
Assilianik eqqumiitsuliortoq, Inuuteq Storch, Sisimiuni najugalik, Venedig Biennalen 2024-imi Danmark sinnerlugu peqataassasoq, Danmarkimi Statens Kunstfondip aalajangerpaa.
- Assut nuannaarutigaara.
Inuuteq Storchip Venedig Biennalen 2024-mi Danmark sinnerlugu peqataanissaanik Statens Kunstfondip toqqaaneranut atatillugu nutaarsiassaq saqqummiunneqarmat, Nordatlantens Bryggemi pisortaq, Karin Elsbudóttir taama nalunaaruteqarpoq.
Naalagaaffeqatigiinni Nunanit Avannarlermeersumit eqqumiitsuliortumik nunarsuarmi eqqumiitsulianik saqqummersitsinerit akimanersaasa ilaanni siullermeerluni peqataasoqassaaq, taanna ukioq allortarlugu pisarpoq.
Nunat 80-init amerlanerusut saqqummersitsiveqarlutik peqataassapput, 2024-milu nunarsuarmit tamanit takuniaasut Inuuteq Storchip Den Danske Pavillonimi saqqummersitai alakkarsinnaassavaat, taanna 20. april 2024-mi ammassaaq.
Sisimiuni inuuneq
Inuuteq Storch maanna Nordatlantens Bryggemi saqqummersitaqarpoq. Tassanilu nammineq assilisimasani aamma Kalaallit Nunaanni assiliisartut siullersaata John Møllerip (1867-1935) assilisaasa sanianni saqqummersippai.
Inuuteq Storchip Sisimiuni najugaqarfimminit inuunerminit assilisaaneersuupput, tassa suliaanit 'Keepers of the Ocean'-mit.
Stochip assilisamini ulluinnarni inuuneq angerlarsimaffimmilu inuuneq sammisarpai. Pisut sukkasuumik assilisimasat – peqatimi ulluinnarni inuunerat assilisimasaani takuneqarsinnaavoq:
Inuuteq Storch assiliigaangami allaaneq ajorpoq assiliivik timaanut ilaaginnartoq, Nordatlantens Bryggemi saqqummersitsinernut akisussaasoq, Mai Misfeldt oqarpoq.
2009-mili saqqummersitsisartoq
Inuuteq Storchip nammineq assiliisartutut sulinermi saniatigut assilisimasanik toqqorsivimmeersunik suliaqarneq aalluppaa. Qanga kalaallit assingi saqqummersinnerisigut, sammivik ataasiinnarmut sammisanngitsoq takutippaa.
Inuuteq Storch (i. 1989) Danmarkimi Fotoskolen Fatamorganami aamma New Yorkimi International Center of Photographymi assiiliisartutut ilinniarsimavoq. Sisimiuni najugaqarlunilu sulisarpoq. 2009-miilli nunatsinni nunanilu avannarlerni, New Zealandimi aamma USA-mi saqqummersitsisimavoq. Atuakkanik assitalinnik arlalinnik saqqummersitsinikuuvoq, kingullermi Keepers of the Ocean (2022) og (John Møllerip suliai) Mirrored (2021).
Nordatlantens Bryggemi saqqummersitaq 29. maj tungaanut takuneqarsinnaavoq.