Siullermeerluni: F-35-t malersuutit Pituffimmiittut
Sakkutuut sungiusarneranni USA F-35-nik timmisartunik malersuutinik Pituffiup eqqaani timmisartortitsivoq.
USA Canadalu januaarip naalernerani The North American Aerospace Defense Commandimi (NORAD) suleqatigiinneranni sakkutuunik annertuumik sungiusartitseqqammerpoq.
Nunat Issittumi killeqarfimminnik illersuisinnaanerannik takutitsivoq.
Sungiusarnermut atatillugu USA siullermeerluni timmisartunik malersuutinik F-35-nik Pituffimmut aallartitsivoq:
- Issittumi suliaqarsinnaassuserput nunatsinnik illersuinissatsinnut aalajangiisuulluinnarput, general Glen VanHerck NORAD-imeersoq aamma US Northern Commandimeersoq, tusagassiuutinut nalunaarummi oqarpoq.
Lektori: Ataavartumik nutarterinermut ilaasoq
Sungiusarneq iluatsilluartoq, generalip nangilluni oqaatigaa:
- Sungiusarnerup NOBLE DEFENDER-ip qaasuitsoqarfiup avannaani silap pissusiini naakkittaatsuni piumassuseqarluarnerput pisinnaanerpullu iluatsilluartumik takutippaa, Issittumilu suleqatitsinnut pingaarutilinnut, Amerikap Avannarlermut avannaani illersuinermik suleqatigiinnermut periuseq uppernarsarparput.
Amerikamiullu maanna F-35-inik Pituffimmut tikisitsinerat malugineqarsinnaavoq, Jeppe Strandsbjerg, Forsvarsakademietimi lektori aamma Nasiffimmut nunanut allanut sillimaniarnermullu ilisimatusarfimmut attumaassuteqartoq, DR-imut taama oqarpoq:
- Amerikamiut Issittumut soqutiginnilernerat kingusilaarpoq. Maanna NORAD-imi suleqatigiinneq nutarterneqarpoq, misilittakkanik sungiusarnernillu ataavartumik nutarterinermut ilaatinneqartoq isumaqarpunga, tassanilu Issittumi suliaqarsinnaanerup pitsanngoriartuinnartinneqassaaq, taanna oqarpoq.
Sakkutuut sungiusarneranni Amerikamiut Canadamiullu 225-t missaanniittut peqatapput, ilaatigut F-35-t sisamat ilaatinneqarlutik.