Siulittaasutut qinigaaqqittoq, Múte Bourup Egede (IA): – Assigiimmik oqalussaagut
Aalajangersimarpasilluni taamaattorli aamma oqaasissaminik oqimaalutaaqqissaarluni Inuit Ataqatigiit siulittaasuat siulittaasutut qinigaaqqittoq Múte Bourup Egede erseqqissaavoq ”torersumik pissuserissaartumillu” partiit suleqatigisami siulittaasui, Hans Enoksen Naleqqap siulittaasua aammalu tapersersortaasut siulittaasuat Aqqalu Clasen Jerimiassen ataatsimeeqatigissamaarlutigit.
Nuannaarluni, oqilisimaarpasissoq taamaattorli aamma suliaminut pimoorussinerminik qularutissaanngitsoq Inuit Ataqatigiit siulittaasuattut ingerlaqqittoq Múte Bourup Egede qinigaaqqammersoq ataatsimeersuarnerallu naammasseqqammersoq Sermitsiamit apersorparput, aviisi Sermitsiaq allappoq.
– Politikkikkut suliniutissagut annertuut aatsaat ilusilersuleruttorpagut ilaallu timitalersullattaalereerlugit, taamaaliornikkut innuttaasut tamarmik tunngavissarissaarlutik peqqillutik siuariartorlutillu inuuneqarnissaannut toqqammavissat suliarileruttorpagut. Tassunga tunngatillugu aamma isertitakinnerit, sulisartut akunnattumillu isertitallit aningaasaqarnikkut oqilisaaffigineqarnissaannik neriorsuuteqarnerput timitalersornialeruttorparput kiisalu inuiaqatigiinni isertitatigut nikinganerujussuaq annikillisarniarlugu sulissutiginnippugut.
– Tamatuma ilutigisaanik aamma inuussurtissarsiornikkut inerisaanissaq, pingaartumik nukissiuutit ataavartut atorlugit inerisaanissaq pingaartipparput. Nunarsuarmi nunarpassuit avatangiisit mianerineqartariaqarnerat tunngavigalugu nukissiuuteqarnikkut minguinnerusumik pilersulernissartik sulissutigileruttorpaat. Nunatsinni nukissiuutinik mingutsitsinngitsunik atuiniarnermi siuttuunissatsinnut periarfissarissaarpugut, ilaatigut erngup nukinga atorlugu immitsinnut pilersuinnarata aamma inuussutissarsiornikkut ineriartortitsinermi nukissiuutitigut pilersuisinnaassuseqarnerput atorluarniagassaraarput.
– Ataatsimut eqikkarlugu saamerlertut inuit atugaat pingaartittorujussuuagut, avatangiiseq minguitsoq pingaartittorujussuuarput aammalu inuussutissarsiornikkut siuarsaanissaq pingaartillutigu, tassa politikkikkut inissisimanitsinni aappaluttuuneq, qorsuuneq tungujortuunerlu tamaasa matussusersinnaavagut.
Taamatut IA-mut siulittaasunngoqqittoq nassuiaavoq, maannalu siulersuisuneeqatigilikkani peqatigalugit partiip tunngaviusumik anguniagai naapertorlugit sulinissamullu pilersaarutaa tunngavigalugu sulinissaat tullinnguuppoq.
Allaaserisaq tamaat uani Sermitsiami atuaruk: