Siulittaasut nikinnerat Danmarkimi malinnaavigeqqissaarneqartoq
Kim Kielsenip Siumup siulittaasuatut Naalakkersuisullu siulittaasuattut Kalaallit Nunaat ukiuni kingullerni arfinilinni avammut annertuumik sinniisuuffigisimavaa. Sapaatip-akunneratali naanerani siulittaasunngorniunneq aqqutigalugu naalagaaffeqatigiinnermi allanngortoqarsinnaassagunarpoq.
Siumumi siulittaasumut qinersineq Danmarkimi maluginiarneqanngitsoorsimanngilaq. Ataasinngornermi ullaakkut nutaarsiassat siulittaasup partiimi amerlanerussuteqartunit tunuartinneqarsimaneranik allaaserisanik imaqarput, Sermitsiaq allappoq.
Isummersorneq nalinginnaasoq tassaavoq ”qulaaninngaannit aqutsivallaarnerup suliallu pitsaanngitsut naggataatigut Kalaallit Nunaata aqutsisua nipaatsoq uppisippaat”, Kristeligt Dagbladimit Kim Kielsen allaaserineqarpoq. Arlalinnit Siumumi ”nikeriarnertut uissuumminartutut” oqaatigineqarpoq, isumaliutigineqarlunilu, aqutsisunngortup naalagaaffeqatigiinneq nunarsuarmilu politikkikkut apeqqutit maanna qanoq isiginiassanerai. Kalaallit Nunaata ineriartorneranik qanimut malinnaaviginnissimasut ilaat tassaavoq illersornissaq pillugu ilisimatusarfimmi, Forsvarsakademimi, lektori, Jon Rahbek-Clemmensen.
– Kalaallit Nunaata Danmarkillu akornanni attaveqatigiinnermi inuit ataasiakkaat annertuumik aalajangiisuusarput. Tassa Aleqa Hammond, Kim Kielsen imaluunniit Erik Jensen naalakkersuisunut siulittaasuunersoq apeqqutaavoq. Taamaalilluni Siumumi siulittaasuuffiup allamit tigummineqalernera soorunami nalorninartorsiornermut aallaaviussaaq. Kisianni Erik Jensenip sunik pingaartitaqarnera pissusiviusuni ilisimasaqarfigivallaanngilarput. Kim Kielsen Danmarkimut attaveqarnermi akuersaartuusimavoq, Københavnimullu aaqqiagiinngissuteqarusuttuusimanani. Inuit Siumup siulersuisuinut ilaasortanngortut Erik Jensenimullu tunuliaqutaasut ilaat naalagaaffeqatigiinneq eqqarsaatigalugu sakkortusaartoqarnerunissaanik ersersitsisimapput, ilimagaarali Kim Kielsenip periaasiata maanna atuukkunnaarneranik oqassalluni mianersuuttariaqartoq. Kalaallit Nunaanni qanoq ineriartortoqarnersoq pissangallunga isiginnaassavara. Tunngavippiaatigulli Kalaallit Nunaat Danmarkimut attaveqarnermik suli isumalluuteqartorujussuuvoq, tamatumalu peqatigisaanik USA-mik suleqateqarnermimk pitsaasumik maanna pilersitsisimallutik,taamaattumik immaqa ernumavallaarnissamut pissutissaqanngilaq, Jon Rahbek-Clemmensen oqarpoq.
Siumumi sammivippassuit
Dansk Institut for Internationale Studierimi (DIIS) ilisimatusartuuneq Ulrik Pram Gad pissutsit ulluni aggersuni qanoq ineriartornissaannik aamma pissanngatiginnippoq.
– Siumut sammivinnik ingerlaartunik siamasissunik eqimattakkuutaanillu assigiinngitsunik imaqartuaannarsimavoq. Kim Kielsen sammivik politikkikkullu tunngavik pillugit paasissutissiinngiippallaartutut peqataatitsinngippallaartutullu isornartorsiorneqarpoq. Erik Jensen tunngavimmik tapersersorneqartumik pilersitsiniarnermini iluatsitsinerussanersoq takussallugu pissanganassaaq. Maannamut nalilissallugu ajornakusoorpoq, kisianni piffissani tamani Siumut naalakkersuisuutitaqarfigisimasaani tunngaviup piffissami attatiinnarnissaa ajornakusoortarsimavoq, Ulrik Pram Gad oqarpoq, Siumumilu avissaartuunnerup Partii Naleqqap 2014-imi aamma Nunatta Qitornaasa pilersinneqarnerannik kinguneqareersimanera innersuussutigalugit.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: