Skip to main content

Siulittaasunngorusussinnaasut avammut tusarliussinaveersaarallartut

Pele Brobergip Jens Napaattuulluunniit Hans Enoksen Naleqqami siulittaasutut taarserlugu siulittaasunngorniarnerlutik suli oqaatigisinnaanngilaat. Siulittaasussamik arfininngorpat qinersisoqassaaq.

Hans Enoksen inuttut atukkani pissutigalugit Naleqqami siulittaasutut ataasinngornermi tunuarmalli, siulittaasunngorusuttunik suli nalunaartoqanngilaq. Siulittaasussaq juunip 25-ani nalunaqutaaqutaq 08.00 "oqarasuaatikkut" ataatsimeersuartoqarnerani toqqaassaaq, partiimit pingasunngornermi tusagassiorfitsigut nalunaaruteqarluni allapput.

Peqqissutsimulli naalakkersuisuusimasoq Kiista Fenckeri Hans Enoksen taarserlugu siulittaasunngorniarnianngilaq, politikkikkut oqaaseqartartup partii arnanit qinersisartunit soqutigineqarnerulissappat qinigassatut piukkunnartunut ilaaneraraluaraa.

Siulittaasunngornissamut suli piareersimanngitsoq

Kiista Fenckeri coronap atuunnerani naalakkersuisutut siullermeerluni atuuffeqartinneraluarluni, partiimi siulittaasuunissamut suli piareersimanani misigisimalluni Sermitsiaq.AG-mut oqaluttuaraa.

- Naamik siulittaasunngorniarlunga sassarnianngilanga. Partiimi ikiuukkusuppunga, piffissamili sivikitsuinnarmi politikkikkut sulisimangama akisussaaffimmik tassannga tigusisinnaanngilanga. Politikkikkummi ingerlatsisarneq aatsaat ilinnnialeruttorpara.

Siulittaasussat piukkunneqartut Jens Napaattuup Pele Brobergillu akornanni kina piukkunnerunerlugu oqaatigerusunngilaa.

- Siullertut apeqqutaavoq kina siulittaasunngorniarluni sassarniarnersoq. Taakku marluullutik partiimut iluaqutaasinnaasunik piginnaasaqarluarput, marluullutillu nunarput nunattaalu namminersulivinnissaa pimoorullugu sulissutigerusuppaat, Kiista Fencker oqarpoq.

Ruttsi Lynge Lennert maannakkorpiaq siulittaasuugallartuuvoq. Taassuma KNR-imut oqaatigisimavaa, kina siulittaasunngorniarluni sassarniarnersoq ilisimanagu. Siulittaasunngorniarlunili sassartoq ataasiinnaassappat aamma nammineq siulittaasutut qineqqusaarniarluni oqarpoq.

- Siulersuisuunerit sassaqqullunga kaammattorsimavaannga, taanna KNR-imut oqarsimavoq.

Pele Brobergip siulittaasunngorniarluni sassassanerluni suli oqaatigerusunngilaa.

Suli eqqarsaatigigaa

Jens Napaattuup partiip inissisimanera suli eqqarsaasersuutigalugu oqaluttuaraa.

- Tamanna ataatsimeersuarnermi oqaluuserisussaavarput. Ataatsimeersuaqataasut kina siulittaasunngussanersoq aalajangertussaavaat. Siulittaasunngorniarluni sassarnissamik nalunaaruteqarneq aalajangerneruvoq annertooq, Napaattooq erseqqissaavoq.

- Erneqarpunga arfineq-pingasunik ukiulimmik, aapparalu Nuummi elektrikerinngorniarluni ilinniarnerminik aallarteqqammerluni, taamaammat "illumi ningiuuvunga". Aapparma ilinniagaqarneranut erninnullu tamanna kingunerluuteqassanngilaq. Ilaquttakka salliupput, siulittaasunngussangumalu ulloq unnuarlu akisussaaffeqartussaallunga. Tamanna eqqarsaasersuutigivara.

Inuinnartut inuunerminik pimoorussilluni aallussinermi oqimaatigiissitsiniarnermilu saniatigut Jens Napaattuup nassuerutigaa, 2004-mi ineqarnermut attaveqaasersuutinullu naalakkersuisuunermini ilassinninnissamut aningaasanik atornerluinermi kingorna politikkeritut ingerlaqqissinnaajunnaarluni isumaqarsimalluni. Tamatuma kingornatigut Østre Landretimit 2009-mi qaammatini sisamani pineqaatissinneqarsimasut inissiisarfianiittussatut eqqartuunneqarsimavoq. Jens Napaattooq siorna angerlarsimaffimmini peqqarniitsumik pisoqarnera Facebookikkut ingerlaartinneqarmat, Inatsisartunit sulinngiffeqarnissamik qinnuteqarsimavoq. 

- Imaassinnaavoq soqutiginarseqqittoq, Jens Napaattooq siulittaasunngorniarsinnaanermik suli ammatitsisoq oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER