Siulittaasunngorniartoq siorasaarneqareernerminit: Siumut isigaluta ingerlaqqitta

Partiimi Siumumi siulittaasunngorniuttut partiip siulittaasuanit taassumallu tapersersortaanit tujorminartumik misigititaasarput siorasaarneqartarlutillu.

Partiimi siulittaasunngorniarluni sassarsimasoq, Vivian Motzfeldt, paartoq.gl-imi ilaatigut taama allagaqarpoq.

Aallaqqaasiilluni nassuiaatigaa siorna aasakkut Siumut sinnerlugu Inatsisartuni ilaasortat arfinillit Naalakkersuisunilu ilaasortaq ataaseq siulittaasumut tatiginnikkunnaarnertik avammut nalunaarutigimmassuk Kim Kielsenip neriorsuutigigaa tulliani ataatsimeersuartoqalerpat nammineq siulattaasutut sassaqqinniarani.

Tamatuma kingorna Erik Jensen siulliulluni siulittaasunngorniarnissamut sassarsimasoq, tassa novemberimi 2019-imi. Vivian Motzfeldt tulliulluni sassarpoq, tassa januarimi 2020-mi. Kingusinnerusukkut Kim Kielsen aamma siulittaasutut sassaqqissalluni nalunaaruteqarpoq.

- Tassa pisut tulleriinneri taamaapput, oqartariaqarpungali taamatut sassarnitsinniit partiitta iluani siulittaasumit tapersersortaanillu tujormisitaanerput assut annertusimammat – uffa partiitsinnut pitsaanerusussaq pillugu sassartugut, Vivian Motzfeldt allappoq nangillunilu:

- Partiimi sassartut arlaqaraangata tamanna partiip nukittuneranik ersersitsinerugaluarpoq atorluagassaq, killormulli pisoqarpoq. Piffissap ingerlanerani ilutsinni siorasaarinerit partiitsinniillu anisitaanissamik siorasaarinerit ataasiunngitsut ingerlanneqarput, Vivian Motzfeldt allappoq.

Partiimi siulittaasunngorniartut ilaat, Erik Jensen, siorasaarneqarsimasinnaaneq pillugu aperigaluarparput. Taassumalli allaatigisaq oqaaseqarfigerusunngilaa.

Upernaakkut ataatsimiinneq saqitsaassutaavoq

Siumumi siulittaasunngorniunnermi sassartoq, Inatsisartuni aamma siulittaasuuvoq. Inatsisartullu upernaakkut ataatsimiinnissaata ingerlatiinnarnissaanut aalajangerneq, tassumunnga tikkuaatigineqartarsimavoq:

- Assersuutissanut ilaasut pingaarnersaattut taasinnaasara tassaavoq upernaaq manna Inatsisartut ataatsimiinnissaannik aaliangiussisimaneq arlaleriarluni uannut tikkuartuussutaasimammat ilaatigut oqaatsit ima nipeqartut anngunneqartarlutik: Siumup Inatsisartut siulittaasuattut issiatippaatsit upernaakkullu ataatsimiinnissaq attatiinnarukku inissisimaffiit nalilersorneqartariaqarpoq, Vivian Motzfeldt ilisimatitsivoq.

Ilanngullugu erseqqissarpaa suliat ilaanni ”eqqunngitsut eqqortunngortinniarnerannut” nukippassuit atorneqartut, maannalu piffissanngortoq inuiaqatigiinnut peqataatitsisumut tusarnaarsinnaassuseqartumullu aquutip tunniunneqarnissaa.

Suaat eqqortuliornerlu

Vivian Motzfeldt Sermitsiaq.AG-mut nassuiaavoq allaatigisani partiimi siulittaasussarsiornermut atatillugu allatarigini.

- Isertuussassaqanngilanga. Aamma erseqqissaatigerusuppara allaatigisara eqqunngitsumit tunngaveqanngimmat. Ammasumik sulinissaq pingaartippara, eqqortunillu saqqummiusserusullunga, ammasumik peqataatitsillunga, Vivian Motzfeldt Sermitsiaq.AG-mut oqarpoq.

Allaatigisamini nipisattassiissutit assersuutigai. Nipisattassiinermi siulittaasup attuumassuteqarpallaarsimasinnaanera pillugu apeqquteqaat aallaavigalugu Inatsisartuni oqaluuserineqarsimavoq.

Sermitsiaq.AG-mut nassuiaavoq isumaqarluni siulittaasoq qinigarluunniit kukkusimaguni nassuertariaqartoq:

- Kukkusimagaanni taava aamma kukkuneq nassuerutigineqartariaqarpoq. Aamma isumaqarpunga tamat oqartussaaqataanerat inuiaat taasinermikkut peqataaffigisartagaat kisiat naammassissallugu naammanngitsoq, aqqutaani inunnik peqateqarneq, oqaloqateqarneq sumullu ingerlaniarnermik oqaluttuarsinnaassuseq pisussaaffiuvoq, soorlu aamma ikinnerussuteqartunut tusarnaarsinnaassuseqarneq pingaaruteqartoq, Vivian Motzfeldt oqarpoq.

Sermitsiaq.AG-p partiip siulittaasuat Kim Kielsen oqaaseqartinniarlugu attaviginiarsimagaluarpaa.