Siulittaasunngoqqittoq: Isorliunerusuni perorsaasussaaleqineq ukkatarissavarput
NPK Ilulissani ataatsimeersuaqqammerpoq. Arnaq Brønlund siulittaasutut unammillerteqarani qinigaaqqippoq. Isorliunerusuni perorsaasussaqarniarneq ukkatarinerussavarput, oqarpoq.
Arnaq Brønlund Nunatsinni Perorsaasut Kattuffiat Ilulissani 24.-26. september ataatsimeersuarmat siulittaasutut qinigaaqqippoq.
Taasisinnaasut 25-t tamarmiusut Arnaq Brønlund siulittaasussatut qinerpaat. Allamik sassartoqarsimanngilaq.
- Tulluusimaarutigaara. Aamma tatigineqarnera nuannaarutigaara, suliakkalu maluginiarneqarsimanerat nuannaarutigalugu. Qinigaaqqikkama tupaallaatigaara, Arnaq Brønlund Sermitsiaq.AG-mut oqarpoq.
Isorliunerusut sammineqassasut
Perorsaasut sulinermi atugassarisaat akissarsiallu ataatsimeersuarnermi eqqartorneqarput. Arnaq Brønlund oqaluttuarpoq isorliunerusuni perorsaasussaqarniarneq aamma sammineqarnerusariaqartoq.
- Ilaasortat ersarilluinnartumik piumasaqarput isorliunerusuni perorsaasussaqarniarneq aamma sammineqartariaqartoq. Suliakkiunneqartoq pimoorussuarput, ajornartorsiullu qanoq annertutiginersoq misissorlugu. Sulisitsisut peqatigalugit tamanna pitsanngorsarneqartariaqarpoq, Arnaq Brønlund oqarpoq.
Taanna ilisimatitsivoq NPK-mut ilaasortat ataasiakkaat saaffiginnittartut isorliunerusuni atorfeqarniarneq pillugu.
Sulisitsisunut oqaloqatigiinnerit
Perorsaasut atorfinitsinneqarnerminni inissamik neqeroorfigitittarnerat aamma oqaluuserisanut ilaavoq. Perorsaasut atorfinitsinneqartut ilaat atorfimmut atatillugu inissaqartinneqartarput, inissialli ilaat nutaannginnerat pissutigalugu perorsaasut peqqinnginnerulernertik maluginiartaraat, NPK-mi siulittaasutut qinigaaqqittup nassuiaatigaa.
- Ajornartorsiutaavoq qaangeruminaattoq perorsaasut inigisartik pillugu atorfik apeqqusertariaqalissappassuk. Inissaqartitsineq pillugu sulisitsisunut oqaloqatiginninniarnissatsinnik aamma suliakkerneqarpugut, ilaasortagut pitsaanerusumik inissaqartinniarneqarnissaat pillugu, Arnaq Brønlund oqarpoq.
NPK-p sinniisui perorsaasut atorfimminni suliarisartagaat pillugu najukkaminni qaammarsaanerunissamik suliaqarniarput. Arnaq Brønlund nassuiaavoq perorsaasut paarsisuinnartut isigineqassanngitsut, assersuutigalugu meeqqap killiffia aallaavigalugu ineriartortitsinermik qitiusumik ikorfartortaammata.
Siulersuisut nutaat
Ataatsimeersuarneq sioqqullugu sulisut sinniisaat aamma pikkorissarneqarput.
Siulersuisunngortut:
- Arnaq Brønlund, siulittaasoq
- UlulînánguaK Kleist, siulittaasup tullia
- Juliane H. Tobiassen, aningaaserisuuneq
- Vibeke A. Petersen, ilaasortaq
- Pipaluk Gedionsen Steenholdt, ilaasortaq
- Ânâ-Grethe Klein, ilaasortaq
- Mini-Emma Kristensen, ilaasortaq
- Eva Sofie Mølgaard, sinniisoq
- Eva Jessen, sinniisoq
- Aani Barlaj, sinniisoq