Siulittaasumut apeqquterpassuit: Múte sammisallu ilungersunartut
Politikkerit upernaakkut ataatsimiinnerisa naajartornerani Múte B. Egede Inatsisartut apeqqutissakinngitsut saanni sammisanut assigiinngitsorpassuarnik apeqqarfissaarfigineqarpoq.
Naalakkersuisut siulittaasuat Múte B. Egede Inatsisartut ataatsimiittarfianni qilaap nunallu akornanni pisorpassuit pillugit apeqqarissaarfigineqarnerani apeqqutissaaleqisoqanngilaq.
Pilersaarutit malillugit – Inatsisartuni apeqqarissaarnertut taaneqartoq – aalisarnermut naalakkersuisoq apeqqarissaarfigineqartussaagaluarpoq. Kisianni Karl Tobiassen pisinnaanngimmat ittoq qungujulaqisoq politikkerit apeqquteqarumatuut saannut sassarpoq.
Sivitsunngitsoq sammisat assigiinngitsorpassuit qaqilerneqarput.
Aviisi AG taama allappoq.
Kalaallit oqaasii, qallunaat ministerianut aalajangersimasumut ilaannut attaveqarneq ilungersunartoq, takornarialerinermik inuussutissarsiutillit unammilligassaat, pisortat allaffissornerujussuisa ajornartorsiutaanerat Naalakkersuisullu matoqqavallaarneri ilaatigut pillugit Múte apeqqarissaarfigineqarpoq.
Aki-Matilda Høegh-Damip folketingip oqaluttarfianniit kalaallisut oqalugiareernerata kingorna oqaatsit oqallisaanera nalinginnaasumik annertuneruleqqapput. Mútemut kalaallisut oqaatsit pillugit apeqqutit aamma imaaginnavipput.
Pisortani allaffissornerujussuaq, sapaatip akunnerata siuliani oqallisaangaatsiartoq, pillugu parteeqataata Mariia Simonsenip qaqeqqippaa. Sammisaq AG-p sapaatip akunnerata siuliani saqqummertumi sammineqangaatsiartoq. Pisortat allaffissorneri minnerutilernissaat politikkikkut anguniagaasoq Simonsenip eqqaasitsissutigaa, maannalu killormut ingerlasoqartoq tikkuarlugu. Marloqiusamilliuna ingerlariuseqarneq Mútep tungaaniit qanoq isikkoqartoq?
Siumumiit Inatsisartuni ilaasortap Najaaraq Møllerip aamma paaserusuppaa Namminersorlutik Oqartussat iluani tamani qaqugu kalaallit oqaasii tamakkiisumik atorneqalissanersut.
- Tamatta sulissutigissavarput. Ullut tamaasa tamatta sulissutigissavarput. Ingammik allaffissornermi kalaallit oqaasii qitiunerussapput, Múte B. Egede akivoq, ilanngullugulu paasissutissiissutigalugu nammineq naalakkersuisoqarfimmini sulinermi kalaallit oqaasii atorneqartut.
- Tusarniaanerni, oqalugiaatini il.il. oqaatsivut atorpagut. Naalakkersuisoqarfinni allani aamma taamaattoqarpoq, erseqqissaavoq.
Aviisimi AG-mi atuarnerusinnaavutit. Aviisi uani pissarsiariuk:
