Siulittaasoqarfimmi sulisussat nutaat
Hans Enoksen Inatsisartuni siulittaasunngorpoq, Kim Kielsen siulittaasumut tullinngorluni.
Taasisunit 29-usunit 20-t Hans Enoksen Inatsisartuni siulittaasussatut toqqarpaat. Siumut sinnerlugu ilaasortat qulingiluaasuat Kim Kielsen siulittaasussatut innersuussutigereerlugu taaseqataanngillat.
Hans Enoksen Inatsisartuni sivisunerpaamik ilaasortaavoq, Inatsisartunilu ukiut 26-t ingerlatiinnavillugit ilaasortaasimalluni. Múte B. Egedep, IA, Jens-Frederik Nielsenip, D, Aqqalu Jerimiassenip, A aamma Jens Napaattuupp, N, Hans Enoksen siulittaasussatut innersuussimavaat.
- Qularinngilara Inatsisartuni siulittaasutut inatsit ataqqillugu sulissasoq. Aamma qularinngilarput Inatsisartuni ilaasortat naalakkersuisooqatiginni illuatungiliuttuniluunniit ilaasortaagaluarpata, tamaasa sullisissagai. Suliassaq kivissinnaavaa, Múte B. Egede innersuussuteqarnermi ilaatigut oqarpoq.
- Qujavunga tatiginnillusi siulittaasussatut toqqarassinga. Milittakkakka tunngavigalugit sulissaanga, aamma ilaasortat tamaasa sullissavakka. Ataqatigiittoqarnissaa sulissutigissavata, suliassarpummi inuiaqatigiinnut pingaaruteqarpoq, Hans Enoksen Inatsisartuni taasisoqareersoq oqarpoq.
Inatsisartuni siulittaasoqarfimmi issiasussat ukuupput:
Siulittaasoq: Hans Enoksen, sinniisussaralugu Jens Napaattooq
Siulittaasup tullia: Kim Kielsen, sinniisussaralugu Erik Jensen
Siulittaasup tulliata aappaa: Kristian Jeremiassen, sinniisussaralugu Mariane Paviasen
Siulittaasup tulliata pingajuat: Jess Svane, Vivian Motzfeldt
Siulittaasup tulliata sisamaat: Aqqalu Jerimiassen, sinniisussaralugu Sofia Geisler
Naalakkersuisussatut innersuussutigineqartut tamarmik akuerineqarput, 20-t akuersaarlutik qulingiluallu taasinngitsoorlutik.