Siulittaasoq nutaaq – piffiit nutaat
Siumumi siulittaasunngorniarluni qineqqusaarneq naammassivoq. Siulittaasoq assuarineqartaqisoq Kim Kielsen unammillertiminit Erik Jensenimit uppisinneqarpoq. Nunatsinni politikki qatsussassaanngilaq siulittaasunngorniullunilu qineqqusaarneq aamma qatsussassaanani. Erik Jensen timersornerup silarsuaanneersuugami unamminerup sivitsorneqarsinnaanerata pisariaqalersinnaanera ilisimasaqarfigaa.
Amerlaqisugut qineqqusaarnerit assigiinngitsut eqqoriarniarsarinissaannut misissoqqissaarnissaannullu nukippassuarnik atuisarpugut. 2020-mi qinersinerit pingaarutillit amerlasuut pipput. Amerikamiut qinersinerat pissangatitseqaaq, allaammi qinersinerup unnuani suli aalajangiisoqarani. Ilisimaneqartutummi tamarmik qinersinissaat qinersinerillu tamarmik kisinneqarnissaat utaqqineqartariaqaramik. Amerikamiut præsidentissaminnik qinersinerat Issittumi tamarmi pisunut pingaaruteqarnersoq, siunissap takutikkumaarpaa.
Siumumi siulittaasumik qinersineq tamatumalu sunniutai taama sivisutigisumik utaqqeqqaartariaqanngilavut. Erik Jensen Sisimiuneersoq unammineq sivitsorneqareersorlu ajugaavoq. Siumumi siulittaasutut qinigaassagaanni 50 procentit sinnerlugit qinerneqarnissaq, Siumup malittarisassaani piumasaqaataavoq. Taamaalilluni aalajangiisuusumik aappassaanneerluni qinersisoqartariaqarluni. Tamatuma kingorna inernera erseqqippoq, Erik Jensenilu M/S Siumumi naalaganngornermigut suliassarpassuaqalerlunilu angisuumik akisussaaffeqalerpoq.
Qinersinerilli taakku marluk maluginiarneqartariaqarput. Maannamut siulittaasuusumut unammillertut marluusut, taasinernit katillugit 71-iusunit katillutik 42-nik qinerneqarput. Aappassaanilli qinersisoqarnerani taasinernit taakkunannga pingasut siulittaasuusumut Kim Kielsenimut qinersinerupput. Tamanna eqqumiilaarpoq, tassami unammillertut marluusut maanna siulittaasuusoq isornartorsiorlugu siulittaasumut sassarmata. Allannguerusullutik taasisut pingasut uggualerlutik taasipput maannamullu siulittaasuusumik qinersillutik. Tamanna eqqumiilaarpoq. Tamannali siulittaasumik nutaamik qinersisoqarneranut allannguutaanngilaq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:
