Siulittaasoq neriorsuivoq: Kanukoka matuneqassanngilaq

Kommunit kattuffiat Kanukoka ingerlaannassaaq. Qitiusumik allaffeqarfiup Maniitsumut nuunneqarnissaanik aalajangerneq aamma atuutsinneqaannassaaq.

Kanukokami siulittaasunngortoq, Simon Simonsen, KNR-imut ataasinngornermi taama ilisimatitsivoq.

Kommunit kattuffianni siulersuisut Maniitsumi sapaatip-akunnerata naanerani ataatsimiinnerisa kingorna tamanna pivoq.

Atuaruk: Akissaatitigut tatineqarnerup kommunit suleqatigiinnissaannut pisariaqartitsineq annertusivaa

Suleqatigiissitaq siunnersuuteqassaaq
Siulersuisut suleqatigiissitaliorniarlutik aalajangersimasut, KNR nittartakkamini allappoq, taakkulu Kanukokap qanoq iluseqarluni ingerlateqqinnissaanut oktobarip aallartinnera nallertinnagu siunnersuuteqassallutik.

Kommunit kattuffimmut ilaasortaasut pingasuusut tamarmik immikkut marlunnik suleqatigiissitani ilaasortaatitaqarput, saniatigullu aamma Simon Simonsen allaffeqarfimmeersorlu ataaseq ilaasortaallutik. Kommunit tassaapput, Kommune Kujalleq, Qeqqata Kommunia kiisalu Qaasuitsup Kommunia. Ilisimaneqareertutut Kommuneqarfik Sermersooq Kanukokamut ilaasortaajunnaarnikuuvoq.

Atuaruk: KANUKOKA-p qullersaqarfia 20 millionit koruunilerlugu tunineqartoq

Akuerineqassasoq
Kommunini pingasuusuni aningaasaqarnermut ataatsimiititaliat oktobarimi ataatsimiittoqalerpat aggersarneqassapput, taakkulu kattuffiup ilusissaa nutaaq inaarutaasumik akuerisussaassavaat.

Qeqqata Kommuniata borgmesteria Hermann Berthelsen siulersuisut sapaatip-akunnerata naanerani ataatsimiinneranni borgmesterini kisiartaalluni najuuppoq, Jørgen Wæver Johansen Ole Dorphilu oqarasuaatikkut peqataallutik.

Atuaruk: Kanukokap siulittaasuata suliniunni taamaatiinnarpaa