Siulittaasoq napparsimajunnaarpoq, ataatsimeeqatigiinnerillu nangeqqillugit
Múte B. Egedep ataatsimeeqatigiinnerit nangeqqippai, Naalakkersuisorli alla coronamut tunillatsissimavoq, angerlarfimmimminilu imminut mattuteqqalluni.
Naalakkersuisut Siulittaasuat Múte B. Egede (IA), Danmarkimi coronavirusimut misissortikkami tunillatsissimasoq paasineqareersoq maanna napparsimajunnaarsimalluni ataatsimeeqateqarnerminik aallartitseqqippoq.
Namminersorlutik Oqartussat tusagassiorfinnut nalunaaruteqarlutik ilisimatitsipput.
Sapaatip-akunnerani matumani ministeriuneq Mette Frederiksen ataatsimeeqatigissavaa kingusinnerusukkullu Tuluit Nunaanni nunanut allanut niueqateqarnermi ministeri Ranil Jayawardena aammalu tuluit Danmarkimi aallartitaat Emma Hopkins ataatsimeeqatigissallugit.
Múte B. Egedep Mette Frederiksen suut pillugit oqaloqatiginiarneraa ilisimatitsissutigineqanngilaq.
Tulunnik ataatsimeeqateqarnissaani, Tuluit Nunaata EU-mit aninerata kingorna tulunnik niueqateqarnissaq pillugu isumaqatiginninniarnissat pineqartut ilimagineqarpoq. Niueqatigiinnissaq ukiuni arlersuni isumaqatiginninniutigineqarsimavoq, tamannalu Kalaallit Nunaata ilaatigut raajanik tunisaqartarnerata qulakkeerneqarnissaanut pingaaruteqarpoq, raajat Tuluit Nunaannut tunisaalluartarput.
Siulittaasoq napparsimajunnaartoq, Naalakkersuisoq alla coronamik tunillatsissimavoq. Isumaginninnermut, Suliffeqarfnermut Nunamullu Namminermut Naalakkersuisoq Mimi Karlsen (IA) Facebookikkut allassimavoq, tunillatsissimagami angerlarsimaannartussanngorsimalluni.