Siulittaasoq: Kalaallit Nunaat aningaasaqarnikkut ajalusoornissamut qanippoq

Ilinniarluarsimasut nunanut atugarissaarfiunerusunut utimut bilitseqaratik aallakaassapput. Taakku ilinniakkatik akisuut aamma ilaquttatik nassassavaat.

Taamaalilluta piukkunnartunik sulisussanik amigaateqalissaagut, nunatsinnilu immitsinnut isumagisussat, aammalu inuussutissarsiutinik isumassarsisut ikilissapput.

Tamanna ersisaarut amerlasooriarlugu tusareerparput. Kisianni tamanna maanna ilumoorsaalerpoq. Nunatsinni Aningaasaqarnermut Siunnersuisoqatigiit siulittaasuat, Torben M. Andersen, danskit aviisianni Børsenimi sammisami annerusumi taama aarlerisaarivoq.

Allanngorfissamiittoq
Tassami Torben M. Andersen naapertorlugu, maanna ineriartorneq ajorluinnarmat, aaqqissuusseqqinnissanik inuussutissarsiornermik sinileriartortumik eqeersaasussanik aallartitsinissamut annerpaamik ukiunik pingasunik periarfissippaatigut:

- Kalaallit Nunaat allanngorfissami inissisimavoq, illuani ajortumik ingerlaneq utikaajaartoq, illuanilu aningaasaqarnermut imminut nammannerusumut saakkiartorneq, aaqqissuusseqqinnissanik annertuunik piviusorsiortunik pisariaqartitsisoq. Tamanna isumagineqanngippat kingunerissavaa, Nunatsinni aamma Nunani Avannarlerni inooriaatsip qaffasissusaasa assigiinngissusaat annertuallaalissaaq, ilinniarluarsimasullu takoriikkatsinnit annertunerusumik nunamit aallartalissapput, Torben M. Andersen naliliivoq.

Ajortumik ingerlaneq utikaajaartoq annertusiartortoq
- Ajortumik ingerlaneq utikaajaartup killingi takoreerpagut, tamannalu sukkasoorujussuarmik ersarinnerulissaaq, Torben M. Andersen Børsenimut taama oqarpoq.

Siulittaasup aalisarnermit isertitat annertunerujussuanngornissai qularaa, taamaattumillu aatsitassarsiornermit aamma takornariaqarnermit isertitaqarnissaq tikkuarpaa.

Aningaasaqarnerput pillugu sammisaq tamaat Børsenimi uani atuarsinnaavat