Siulittaasoq: Ataatsimiititaliaq oqaasissaqarnerusariaqarpoq

Nunanut allanut sillimaniarnermullu politikki piffissami kingullermi tusagassiorfitsigut inuillu attaveaqatigiittarfiisigut sammineqarsimaqaaq. Inatsisartut Nunanut allanut Sillimaniarnermullu Ataatsimiititaliaani siulittaasup maanna nalunaarutigaa, inatsit allanngortinneqartariaqartoq.

Tamanna pissaaq, Naalakkersuisut nunanut allanut sillimaniarnermullu politikkikkut sammineqartussat pingaarutillit pillugit ataatsimiititaliamik oqaloqateqarnissamut avaqqussisannginnissaat anguniarlugu:

- Isumaqarpunga ataatsimiititaliap piginnaatitaanerunisaa siunissami qitiutinneqartariaqartoq, siulittaasoq Sofia Geisler (IA) Sermitsiaq.AG-mut oqarpoq, nangillunilu:

- Pingaaruteqarpoq Inatsisartut Naalakkersuisullu tatigeqatigiillutik ataqqeqatigiillutillu oqaloqatigiittarnissaat. Siusinnerusukkut maannalu attaveqatigiittarnermut tamanna ilisarnaataasimavoq, pingaaruteqarporli tamatuma inatsiseqartinneqarnissaa.

Piginnaasanik annertusaaneq oqallisigineqarsimasoq

Piffissami kingullermi sammineqarsimasut ilaatigut tassaapput Naalagaaffeqatigiit Issittumut periusissiaat aamma Issittumi illersornissaq nukittorsarniarlugut piginnaasanik annertusaanissamut 1,5 milliarder koruuninik immikkoortitsinissamik Folketingimi aalajangiisoqarsimanera.

Oqallittoqarnerani Nunanut allanut Naalakkersuisoq Pele Broberg (N) arlaleriarluni uissuumminartunik oqaaseqartarsimavoq.

Oqaaseqartarsimanerata malitsigisaanik Inatsisartut Nunanut allanut Sillimaniarnermullu Ataatsimiititaliaata Pele Broberg Naalakkersuisut politikkiat pillugu siunersiueqatiginiarlugu qaaqqusimavaa. Siunersiueqatigiinneq pingasunngormat ingerlanneqarsimavoq.

Siunersiueqatigiit matoqqasumik ingerlanneqarsimavoq, taamaammat innuttaasut paasisaqarnissaat killeqarpoq.

Qinikkat nakkutilliinerusariaqartut

Ataatsimiititaliap sisamanngormat tusagassiorfinnut nalunaarutaani allassimavoq:

- Nalunaaruteqartarnerit assigiinngitsut sapaatit akunnerini kingullerni tusagassiorfitsigut sammineqarsimasut ilaatigut paasisaqarfigineqarnissaat ataatsimiititaliap kissaatigisimavaa. Suliassaqarfinni pineqartuni naalakkersuinikkut anguniakkatik Naalakkersuisut
oqaasertalereerpatigit sukumiinerusumik paasissutissinneqarnissani ataatsimiititaliap qilanaaraa.

Siulittaasup ataatsimeeqatigiissimanermut atatillugu oqaatigaa, Naalakkersuisut nunanut allanut tunngatillugit suliaat ataatsimiititaliamit nakkutigineqartarnerat nukittorsarneqartariaqartoq:

- Ataatsimiititaliamit maluginiarneqarsimavoq, nunanut allanut sillimaniarnermullu politikki inituujusoq sulilu initunerulersussaasoq. Kalaallit Nunaata nunarsuarmi inissisimaffia pissutigalugu.

- Piffissaq manna nunamut pingaaruteqartupilussuuvoq, taamaammallu Naalakkersuisut ataatsimiititaliallu suleqatigiinnerunissaat pisariaqarpoq, Sofia Geisler oqarpoq.

Siunnersuut siulittaasoqarfimmut nassiunniaraa

Sofia Geisleri isumaqarpoq, siunnersuutip Inatsisartut Siulittaasoqarfiannut nassiunneqarnissaa ataatsimiititaliami tapersersorneqarluassasoq. Siunnersuuteqarnermi anguniarneqarpoq, ataatsimiititaliap Folketingimi Nunanut allanut Ataatsimiititaliatulli piginnaatinneqarnissaa:

- Inatsimmi allassimavoq, pissutsit pingaarutillit tamaasa ministerip ataatsimiititaliamut saqqummiuttassagai.

- Isumaqarpunga ataatsimiititaliap piginnaatinneqarnerunissaata qulakkeerneqarnissaa pingaaruteqartoq, avatitsinnummi atatillugu toqqissisimasumik pitsaasumillu atassuteqartarnissatsinnut tamanna pingaaruteqarmat, Sofia Geisler oqarpoq.