Siulittaasoq appisaluussisoq: Isumaginninnermut siunnersortit naammaginartumik isumagineqanngillat

Isumaginninnermut siunnersortinut sulisitsisut sullivimmi avatangiisit toqqissisimanartuullutillu peqqinnartuunissaannik akisussaaffimminnik kivitsisariaqartut, Atorfillit Kattuffianni siulittaasoq, Dina Olsen isumaqarpoq.

- Ilaasortavut oqimaatsunik suliaqarsimatillutik siunnersorneqarnissamik tarnillu pissusiinik ilisimasalimmit ikiorserneqarnissamik amigaateqarput, Dina Olsen oqarpoq.

Pimmatiginninneq aamma sioorasaarinerit kiisalu attaveqaqatigiinneq pitsaanngitsoq aamma sulisut amigarnerat uippakajaarnermut pissutaapput, Atorfillit Kattuffianni siulittaasoq, Dina Olsen isumaqarpoq.

Kattuffiup misissuinerata kingorna taamatut oqariartuuteqarpoq, tassani sulisut 70 procentii, isumaginninnermut siunnersortit, inunnik isumaginninnermik suliaqartut kiisalu isumaginninnermik aqutsisoqarfimmi sulisut sapaatip-akunnerini marlunni kingullerni uippakajaarnermik misigisaqarsimanerannik takutitsivoq.

Ernumanartoq, kisitsisilli tupaallaataanngitsut.

Ilaasortat pingajorarterutaat piffissami sivisunerusumi uippakajaarnermik misigisaqarsimasut, 2020-mi misissuinerup takutippaa. Inernerit taakku Atorfillit Kattuffianni siulittaasup ilisimareerpai.

Sinniisunut paasissutissat

Kisianni sooruna isumaginninnermut siunnersortit atugaat ilungersunartut pitsaanerusumik iliuuseqarfigineqanngitsut?

Kattuffiup sullivimmi pissutsit atukkat pitsaanngitsut tamanut sulisitsisunullu uippakajaarneq pillugu misissuinermit 2020-meersut nalunaarutigisimagai, Dina Olsenip nassuiarpaa.

- Uagut (Atorfillit Kattuffianni, aaqq.) ilaatigut tarnip pissusiinik ilisimasalik suleqatigalugu qallunaatut kalaallisullu paasissutissanik pappiaqqanik suliaqarnikuuvugut, taakku sinniisutsinnut tunniuppagut. Taakku uippakajaarnermik pinaveersaartitsisoqarsinnaaneranut tunngapput, taanna oqarpoq.

Ajornartorsiummut allannguivallaarsimanngitsut taassuma nassuerutigaa, kisianni ilaasortat ilaasa sakkussat pitsaasuuneraraat, Dina Olsen ilisimatitsivoq.

Sulisut isumagilluarneqanngitsut

Siulittaasoq illuanik sulisitsisunut isornartorsiuivoq.

- Misissuinerup tikkuussineratut suliassat amerlassusaannut sanilliussigaanni sulisut ikippallaartut isumaqarpunga. Sulisitsisut tamanna iliuuseqarfiginngilaat, imaassinnaavoq sipaarniarlutik, taanna oqarpoq, sulisitsisullu suliassaqarfiup pilerinartunngortinniartariaqaraat ilanngullugu oqaatigaa.

Ilaasortat suliassaminnut tunngatillugu ersarissunik malittarisassaqannginnerat, aamma allaffissornikkut suliakkersorneqartartut, Dina Olsenip oqaatigaa. Piffissamik atuiffiuallaarput, taarsiullugu sullitanut atorneqarsinnaagaluarput.

Aammattaaq sulisitsisut sulisuminnik isumaginnilluanngitsut, siulitaasoq isumaqarpoq.

- Ilaasortavut oqimaatsunik suliaqarsimatillutik siunnersorneqarnissamik tarnillu pissusiinik ilisimasalimmit ikiorserneqarnissamik amigaateqarput. Sulisitsisut tamakku salliutinngilaat. Immaqa aamma sipaarniaramik.

Nangilluni oqarpoq:

- Taakku isumaqatigiinniarnernut atatillugu kattuffittut qaqittariaqarpagut. Sullivinni avatangiisinut inatsit naapertorlugu sulisitsisut sullivinni avatangiisit peqqinnartuunissaat isumannaatsuunissaallu isumagisussaavaat.

Uippakajaarneq akisuvoq

Isumaginninnermut siunnersortit amerlanerusut sulilersinnissaat sooq ajornakusoornersoq, Dina Olsenip paasisinnaavaa.

- Inuit suliassat amerlavallaarnerat aamma sulinermi atukkat pitsaannginnerat tusartarunikkit paasinarpoq – soorlu misissuinerup kingulliup tamanna ersersikkaa.

Sulisitsisut politikerillu misissuineq qimerloortariaqarpaat, ilinniarfigalugu atukkat aamma ajornartorsiutit iliuuseqarfigalugit, Dina Olsen isumaqarpoq. Kattuffik innuttaasunut paasissutissiinikkut sulisitsisunullu saaffiginninnermigut suliassaminik suliarinnittoq, taassuma naqissuserpaa.

- Atukkat iluarsineqarnissaasa tamanut pingaaruteqarnerat, taakku (politikerit sulisitsisullu, aaqq.) paasiartuleraat isumaqarpunga. Sullivimmi avatangiisit sapinngisamik pitsaanerpaassapput. Uippakajaarneq aningaasaqarnikkut inuttullu akisuvoq.

Powered by Labrador CMS