Skip to main content

Siulittaasoorunneq pillugu suli oqqattoqartoq

Suleqatigiissitsisuni kina siulittaasuusanersoq paatsiveerussutaalluinnarpoq. Ileqqoreqqusat maililu naapertorlugit aappaa siulitaasuusussaavoq, siulersuisuunerilli aappaanut tapersersuillutik.

Michael Rosing siulittaasunngoqqikkusuppoq, siulittaasuugallartulli Tillie Martinussenip siulittaasuuneq qimakkusunngilaa. Isumaqatigiinngissutigaat Michael Rosing siulittaasutut tunuarsimanersoq imaluunniit sulinngiffeqarnersoq aamma Tille Martinussen nuna tamakkerlugu ataatsimeersuarnermi siulittaasutut toqqarneqarsimatinnagu Michale Rosing siulittaasunngoqqissinnaanersoq.

Tillie Martinussenip Sermitsiaq.AG-mut ilisimatitsissutigaa, Michael Rosing sapaatip akunnerani kingullermi mailimik nassiussisimasoq, tassani siulersuisuunernut nalunaarutigisimavaa siulittaasutut atuutileqqikkusulluni siulersuisuunernullu ilaasortanngoqqikkusulluni. Tillie Martinussenilli maannalu siulersuisuunerit sinnerisa tamanna itigartitsissutigisimavaat.

- Ajuusaarutigaara Michael Rosingip siulersuisuunernut ornigulluni matumannga aaqqiissuteqarnissaq pinnagu tusagassiorfinnut saaffiginneqqaarsimanera. Siulittaasunngoqqissinnaanera itigartikkaluaripput, naapeqatigiinnissaq suleqatigiinnissarlu ammaffigiuarsimavarput, taamaalillutami eqqissisimasumik tamanna aaqqiiffiginiassagatsigu. Tamannali ajornarsimavoq, Tillie Martinussen oqarpoq.

Nutaamik siulittaasortaartoqartinnagu aningaasaqarneq aaqqiiffigerusukkaa

Ilaatigut partiip aningaasaataanik siunertamut naapertuutinngitsumik atuisoqarsimaneranik atuisimanerullu uppernarsaatissaqartinneqannginneranik pasilliutit pissutigalugit Michael Rosing, 2019-imili martsip qaammataani nuna tamakkerlugu politikkimik suliaqarunnaareeraluarluni partiimut uteqqikkusulersimavoq. Tillie Martinussenilli siulersuisuunerillu pasilliutigineqartut tamaasa ilumuunnginnerarpaat. 

- Partiimi suli siulittaasuungama pisumi matumani suna ilumoornersoq paasisariaqarapara. Neriuutigaara piaarnerpaamik nuna tamakkerlugu ataatsimeersuartoqarsinnaassasoq, ileqqoreqqusat malillugit siulittaasussamik allamik toqqaaniassagatta, Michael Rosing oqarpoq.

Sermitsiaq.AG-mit mail 2019-imi maajip qaammataaneersoq tigummineqarpoq, tassani Tillie Martinussen KNR-imut allassimavoq, Michael Rosing sulinngiffeqartoq, namminerlu siulittaasuugallalersimalluni. 

Partiip ileqqoreqqusaani allassimavoq:

Immikkut ittumik Nuna tamakkerlugu ataatsimeersuarneq:

Pissutsit uku atuutilissappata, siulersuisuunerit ullut 30-t qaangiutsinnagit immikkut ittumik nuna tamakkerlugu ataatsimeersuarnissamut qaqqusissapput: • Siulittaasoq tunuarpat, toqukkut qimaguppat, qinigaasinnaanngitsutut nalilerneqarpat imaluunniit siulittaasutut suliassaminik isumaginninnissamut arlaatigut akornuserneqarpat.

Partii 2018-imi pilersinneqaramili nuna tamakkerlugu suli ataatsimeersuarsimanngilaq. Ileqqoreqqusani allassimavoq, partii ukiut tamaasa martsip aallaqqaataa nallertinnagu nuna tamakkerlugu ataatsimeersuartassasoq, aamma partiip siulittaasua ukiuni marlunni atuuttussatut toqqarneqartassassoq.

Ukioq manna siulittaasussamik qinersisoqartussaagaluartoq 

Ileqqoreqqusat naapertorlugit, Michael Rosing siulittaasutut tunuarmat/tunuarsimappat immikkut ittumik nuna tamakkerlugu ataatsimeersuarnissamut qaaqqusisoqarsimasussaagaluarpoq.

Siulittaasutut tunuarani sulinngiffeqaannarsimappat, kingusinnerpaamik ukioq manna martsip aallaqqaataani nuna tamakkerlugu ataatsimeersuarnermi siulittaasussamik qinersisoqartussaasimagaluarpoq.

Covid-19 pissutigalugu ukioq manna nuna tamakkerlugut ataatsimeersuartoqarsimanngilaq, suulli tamarmik ajunngippata decembarip qaamataani ataatsimeersuartoqarnissaa pilersaarutaasoq, Tilliie Martinussen ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER