Siulitta sakkui sanaartorfimmi nassaarineqartut

Sisimiut Katersugaasiviat ulluni makkunani suliassaaleqinngilaq. Sisimiuni Sømandshjemmep allilerneqarnissaanut sanaartorneq maanna uninngatinneqarallarpoq, assaanermilu puugutakut, nerinermi atortut, saarngit allallu nassaarineqareersimalerput.

Atortut, saarngit allallu hunnorujulikkuutaat, ilaallu 1600-1800-kkunneersorineqarsinnaasut, Sisimiuni sanaartorfimmi nassaarineqarput.

Innuttaasut Sisimiut Katersugaasivianut nassaarineqartut pillugit saaffiginnissimapput. Nassaarineqartut Sømandshjemmep allilerneqarnissaanut sanaartorfimmeersuupput, Sisimiuni illoqarfiup nutaannginnersaani Narsannguami, katersugaasiviup ungasinngisaani.

- Itsarnisarsiuut uumasorsiuullu Activating Arctic Heritagemeersut nassaarfiusumi misissugassamik tigusipput, taakkulu takutippaat nuna assaaffigineqartoq marrarnik nerinermut atortunik, saarnginillu peqartoq, allarpassuarnillu nassaarfiulluni. Sanaartortitsineq unitsipparput, GUX/NGK-milu kulturilerinermik ilinniartut aggersarlugit, taakkulu peqatigalugit assaaneq tallimanngormat aallartillugu, katersugaasiviup pisortaa Dorthe Katrine Olsen Sermitsiaq.AG-mut oqaluttuarpoq.

Assaanermi keramikkit, kikissat, nerinermi atortut, uumasut assigiinngitsut saarngi siulittalu piniariarnermi sakkugisarsimasaat arlallit nassaarineqarput.

- Sakkut 1600-kkunni, 1700-kkunni 1800-kkunniinngaanneersuusimasinnaasut tupinnaannartumik nutarpasipput, nunami pooqqasimagamik. Nassaarisagut tamarluinnarmik kulturimik inooriaatsimillu oqaluttuartuupput. 2021-mi allaat tamakkuninnga nassaartoqarsinnaanera tupinnarluinnarpoq nuannerlunilu, Dorthe Katrine Olsen oqarpoq.

Oqaluttuarisaaneq assanneqarpoq

Taanna ilisimatitsivoq nassaat qanoq amerlatigineri maannamut ilisimaneqanngitsoq, suli kisinneqanngimmata. Uumasuniilli saarngit assigiinngitsut hunnorujulikkaat tuusintilluunniit sinneqartut nassaarineqareersimapput. Nassaat suulluunniit soqutiginaateqarneri katersugaasiviup pisortaata erseqqissarpaa, nunatta oqaluttuarisaaneranut tamarmik ilaammata.

- Kisianni tuukkaq, qulleq illaagutaasimasullu saarngimit sanaat naleqartorujuupput. Siulitta sakkugisimasaat naleqarluinnarput, nunattalu oqaluttuarisaaneranik tamarmik oqaluttuartuullutik. Assaavimmi nassaarineqartut 1960-ikkut tikillugit oqaluttuassartaqarput, oqarpoq.

Immikkoortiterisoqartariaqarpoq

Sisimiut Katersugaasiviat mikisumik pequusiveqarpoq. Katersugaasiviup pisortaa Dorthe Katrine Olsen ilisimatitsivoq nassaarineqartut tamakkerlugit paarisinnaanagit. Nassaarineqartulli immikkoortiterneqartariaqarput, katersugaasiviullu toqqortaatigiligassai immikkoortinneqarlutik.

- Tullinnguupput nassaarineqartut salinnissaannut passunnissaannullu, kiisalu katersugaasiveeqqatsinni saqqummersitsinissamut aningaasassarsiornissaq. Uumasut saarngi sorliit Danmarkimut misissugassanngorlugit nassiunnissaannut aamma aalajangiisariaqassaagut. Nassaarineqartut tamaasa ajoraluartumik toqqortaatigisinnaanngilagut, oqarpoq.

Sisimiuni Sømandshjemmep allilernissaanut sanaartorneq 6. september aallarteqqinneqassaaq. Tamassuma tungaanut Sisimiut Katersugaasiviat assaatitsivoq, amerlanerpaanik nassaartoqarnissaa anguniarlugu. Dorthe Katrine Olsenip erseqqissarpaa assaaneq Sisimiuni coronamut killilersuutit malillugit eqimattakkaartitsilluni ingerlanneqartoq. Taassumallu qujamasuutigaa innuttaasut kajumissutsiminnik peqataarusussuseqarluarnerat.

Powered by Labrador CMS