Skip to main content

Siulersuisut siulittaasuat: Mittarfissaq naannerussaaq

KAIR-ip siulersuisuini siulittaasup Jóhannus Egholm Hansenip mailikkut allakkamini inerniliussaa ersarippoq. Qaqortumi mittarfissaq naannerulersinneqassaaq, tassa suliassamut aningaasaliissutaasut naapertorlugit suliassaq naammassineqassappat.

Qanittukkut ammasumik siunersiueqatigiinnermi saqqummiunneqarpoq, Kujataani mittarfiliornissamut nutaamik neqeroortitsisoqannginnerani takorluukkanik arlalinnik KAIR sulissuteqartoq. Siulersuisunili siulittaasoq Namminersorlutik Oqartussanut mailikkut allakkamini toqqaannarnerusumik oqaaseqarpoq, naannerusumillu mittarfiliornissamut sanilliullugu periarfissaasinnaasunik allanik takusaqarsinnaanninnerarluni.

Kalaallit Airportsip siulersuisuini siulittaasup Jóhannus Egholm Hansenip Namminersorlutik Oqartussanut mailikkut allagaa aggustip17-ianeersoq Sermitsiaq.AG-mit takuneqarsimavoq.

Siulersuisut siulittaasuata mittarfiliornissaq pillugu neqeroorutigineqarsimasut tallimat pillugit pissutsit malikkut nassuiaatigisimavai. Neqeroorutit tallimaasut tamarmik, aningaasartuutissatut missingikkanit KAIR-ip siunnersuisuinit suliarineqarsimasunit qaffasinnerungaatsiarsimapput.

Aningaasartuutaasussat qaffasinnerusut arlaqartut

Namminersorlutik Oqartussat 2018-mi novembarip qaammataani mittarfiliornissat pillugit sanaartorneqermut inatsimmi immikkoortitassatut aalajangersimasaannit neqeroorutigineqarsimasut akikinnerpaat allaat qaffasinnerusimapput. Allagaatini pineqartuni aningaasat akigitinneqartussatut neqeroorutaasimasut immikkuualuttullu allat takusinnaajunnaarlugit titarneqarsimapput, tassani pisortat aningaasaqarnikkut soqutigisaat pingaarutillit illersorniarlugit.

Neqeroorutigineqartut akisuallaanerisa saniatigut, suliassami aningaasartuutaasusat allat naatsorsuutgisimasamit qaffasinnerulersimapput. Tamatumani ilaatigut pineqarput oqartussat piumasaqaataat, suliassamut allannguutit, illuutit ingerlatsinermilu aningaasartuutit, siulersuisut siulittaasuat allappoq. Tamakkulu avataanit aningaasaliiffigineqarnikkut aaqqiiffigineqarsinnaanngillat.

Namminneerlutik aningaasanik taarsigassarsisinnaanngitsut

KAIR-mi mittarfiliornissamut aningaasat amigaataasut sinneri pissarsiariniarlugit nammineerluni aningaasanik taarsigassarsiniarnissamut periarfissaqanngilaq, ingerlatsinissamut pilersaarut naapertorlugu amigartooruteqartussaagami.

Taamaammat neqeroorutigineqarsimasut taakku tallimaasut ilaannut akuersaassagunik Namminersorlutik Oqartussat amerlanerusunik aningaasaliissuteqarusussinnaanerat KAIR-imit pinngitsoorneqarsinnaanngilaq.

Mailikkut nassiunneqarsimasoq naapertorlugu, aningaasaliissutigineqarsimasut qaffanneqarsinnaanerat pillugu KAIR-ip Namminersorlutik Oqartussanut apeqqutigisimavaa, pisortatigoortumilli akissutisisimanatik. Taamaammat siulersuisuni siulittaasup neqeroorutigineqarsimasut akikinnerpaat akuersaarsinnaasimanngilai, tassani neqeroortitsineq suli naammassineqanngitsoq aningaasaliissutiginiarneqartut inissinneqarsimannginnerat pissutigalugu.

1.199 miiteri aaqqiissutissatuaasoq

Tamatuma malitsigisaanik neqeroortitsinerup taamaatiinnarneqarnissaa aalajangiunneqartariaqarpoq.

Siulersuisuni siulittaasup erseqqissaatigaa, suliassatut aalajangiunneqarsimasoq neqeroorutigeqqissalugu isumaqanngitsoq. Taannami naapertorlugut, neqeroortitsisoqaqqissappat pingaarutilinnik naleqqussaasoqartariaqartoq, tassa aningaasartuutissat ingerlatseqatigiiffiup Namminersorlutillu Oqartussat raningaasaliissutigisinnaasaasa qaffaseqqataattut annertutigisunngorlugit.

- Namminersorlutik Oqartussat mittarfissap 1.199 miiterinngortillugu naannerulersinneqarnissaanik (1.500 miiterimut paarlaallugu) eqqarsaat siusinnerusukkut itigartitsissuteqarsimagaluarpataluunniit, isumaqarpunga aningaasartuutissat kissaatigineqartutut qaffasissusissaannut annikillineqarnissaat periarfissatuaasoq, Jóhannus Egholm Hansen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER