Siulersuisut akissarsiaat qaffanneqangaatsiarput
Suliffeqarfinni kommunip pigisaani siulersuisuni ilaasortat akissarsiaat qaffaaviginiarlugit, Kommuneqarfik Sermersuup aalajangerpaa.
Illoqarfiit pingaarnersaata kommuniani suliffeqarfinni kommunip pigisaani siulersuisuni ilaasortat akissarsiaat 60 procentimik qaffaavigineqassasut, Sermitsiaq.AG-p paasivaa.
Suliffeqarfinni kommunip pigisaani siulersuisut ataatsimeersuassapput, akissarsiallu qaffaavigineqarnissaat oqaluuserisassani ilanngunneqarsimavoq.
Inissiaatileqatigiiffik Iserit, Nuup Bussii aamma illoqarfiup ineriartortinnissaanut suliffeqarfik NCD pineqarput. Akissarsianut politikkissaq kommuni sinnerlugu Nuuk Imeq-mi siulersuisuni ilaasortanut aamma ilaavoq, tassani Kuupik V. Kleist siulersuisuulluni.
Immikkut 45.000 koruunit
Siulersuisuni siulittaasut ukiumut 75.000 koruuninik akissarsitinneqartaraluartut maanna ukiumut 120.000 koruuninik akissarsiaqartinneqalissapput. Tassa akissarsiaat 45.000 koruuninik ilaneqarlutik.
Siulersuisuni ilaasortat 37.500 koruuninik akissarsiaqartinneqartut 60.000 koruuninut qaffaavigineqassapput. Tassa akissarsiaat 22.500 koruuninik ilaneqassagamik.
Siulersuisuni piukkunnartunik ilaasortassarsiornerup ajornakusoorneranik, akissarsiat qaffanneqarnerat tunuliaquteqarpoq.
Naak ingerlatseqatigiiffinni kommunini pigineqartuni akissarsiat qaffariarneqangaatsiaraluartut, Namminersorlutik Oqartussat ingerlatseqatigiiffiini siulersuisunut akissarsiaritinneqartartunit appasinnerujussuupput.
Assigiinngissuterujussuaq
Inissiaatileqatigiiffik Iserit qiviaraanni, taanna Inimut assersuunneqarsinnaavoq, tassanilu suli akissarsiaritinneqartartut assigiinngitsorujussuupput.
Iserimi siulittaasoq 120.000 koruuninik pisarpoq, Inimi siulittaasoq 350.000 koruuninik akissarsiaqartinneqartartoq. Siulersuisunut ilaasortat 60.000 koruuninik aamma 125.000 koruuninik akissarsitinneqartarput.
Akissarsiaqartinneqanngitsut
Illoqarfimmik ineriartortitsinermut ingerlatseqatigiiffiup NCD-ip ilaasortai marluk kommunip ingerlatsiviani atorfeqarput. Tassa kommunimi pisortaq Lars Møller-Sørensen, siulersuisunut siulittaasoq, aamma Sanaartornermut Avatangiisinut ingerlatsivimmi pisortaq Hans Henrik Winther Johansen. Atorfeqarnertik pissutigalugu siulersuisutut sulinerminni akissarsiaqartinneqanngillat.
Akissarsiat qaffanneqarnissaanut aalajangerneq kommunip Aningaasaqarnermu Inuussutissarsiornermullu Ataatsimiititaani politikerinit aalajangerneqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...