Siulersuisuni siulittaasup pisortap kattuttoqarnissaanut tunngasumik oqaaseqarnerata kingorna naqqippaa
Siulersuisut aqutsisullu INI A/S-ip aamma Illuut A/S-ip kattunneqarsinnaanerat pillugu aallarniutaasumik oqaloqatigiinnermut peqataasimasoq, Namminersorlutik Oqartussat inissiaatileqatigiiffiutaani Illuut-mi siulersuisuni siulittaasoq oqarpoq.
Namminersorlutik Oqartussat aktiaatileqatigiiffiisa ikilisarneqarnissaat kissaatigineqartoq, Naalakkersuisut ukiumi kingullermi oqaatigisarpaat. Tamanna ilaatigut ingerlatseqatigiiffinni pineqartuni ileqquusumik ataatsimiittoqarnerani pivoq.
Ingerlatseqatigiiffiit arlallit immaqa kattunneqassapput, kattunneqarsinnaasunilu oqaluuserineqartut tassaapput INI aamma Illuut. Tamanna marlunngormat Namminersorlutik Oqartussat piginnittuunermut politikkiata killissaliussamik isumaqatigiissutip saqqummiunneqarneranut atatillugu oqaatigineqarpoq.
Tamatuma kingorna Illuut A/S-imi pisortaq, Torben Pauls, KNR-imit apersorneqarnermini, kattussisoqarsinnaanera pillugu aatsaat tusagaqarluni oqarpoq:
- Tusariinngilarput. Tusagassiortunik katersortitsisoqarnissaanut minutsit 15-it sioqqullugit mailimik tigusaqarpugut, pisortaq KNR-imut oqarpoq.
Oqaloqatigiinnernut peqataasut
Illuut-mi siulersuisuni siulittaasoq, Steffen Ulrich-Lynge, tusagassiuutinut nalunaarummi uissuumminartumik pisortaminnut naqqiissuteqarpoq:
- INI A/S-imik aamma Illuut A/S-imik ajornanngippat kattussinissaq pillugu isumaliutigisanut tunngasunik aallarniissutitut oqallinnerni siulersuisut aamma siulersuisoqarfiup peqataasimanerat Illuut A/S-ip matumuuna erseqqissassavaa.
- Tamanna ilaatigut nalinginnarmik ataatsimeersuarnermi, kiisalu piginnittup sinniisuisa aamma Illuut A/S-ip akornanni oqaloqatiginnilluni ataatsimiinnerni allani pisimavoq, Steffen Ulrich-Lynge allappoq.
Oqaaseqarnerit akuersaarneqarsinnaanngitsut
Pisortap oqaaseqarnera taama oqaaseqarnera akuersaagassaannginnerarpaa:
- Ulloq 30. marsi 2023-mi pisortaanerup Torben Paulsip oqaatigisai sioqqullugit siulersuisullu isumaqatigiissutaasimanngillat, tamannalu siulersuisut assut ajuusaarnartutut akuerisassaanngitsutullu isigaat.
Ulrich-Lyngep oqarnera naapertorlugu, maanna aallartisarneqalersumut ingerlatassamut Illuut A/S-imi siulersuisut qilanaarinnipput, aammalu iluarsiissut taanna pillugu sinniisunik tamanik suleqatiginnilluarnissaq naatsorsuutigaat.
Sermitsiaq.AG-p Torben Pauls attaveqarfigaat, taannalu allamik oqaaseqarnissani kissaatiginngilaa.
Illuut aamma INI-p kattunneqarsinnaanerisa saniatigut Sikuki Nuuk Harbour aamma RAL-ip kattunneqarnissaanut misissuinermik suliaqartoqassaaq.