Siulersuisuni siulittaasoq: Coronap ajornartorsiortitsinerata mittarfeqarfik akikinnerulersissinnaavaa
Kalaallit Airportsimit sanasut Qaqortumi mittarfiliortussat qinnuigereerlugit, aalajangerneqarsimavoq neqeroortitsinissamut piffissaliussaq påskereernissaanut kinguartinniarlugu. Coronap ajornartorsiortitsinera Qaqortumi mittarfiliornissaq akikinnerulersissinnaavaa
Coronap ajornartorsiortitsinera Ilulissani Nuummilu mittarfiliornissamut imatut suli sunniuteqanngilaq, Kalaallit Airportsimi siulersuisut siulittaasuat Johannes Egholm Hansen Sermitsiaq.AG-mut ilisimatitsivoq.
- Ilulissani mittarfiliortut ineqarfissaannik sanaartornissaq aamma mittarfissap nutaap tungaanut aqquserniornissaq apriilimi aallartissasut pilersaarutaagaluarpoq. Suliassat taakku kingusinaartumik aallartinneqassapput, suliassamulli atatillugu piffissaliussamut tamarmut sunniuteqarnavianngitsumik, Johannus Egholm Hansen ilisimatitsivoq.
Nalorninartoq
Siulersuisuni siulittaasup ernumaginerpaavaa, coronap ajornartorsiortitsinerata sivisusinnaanera.
- Timmisartoqqusinnginneq sivitsussappat sanasut eqqorneqarsinnaapput, tassa Nuummi sulisut paarlanneqarnissaat amerlineqarnissaallu eqqarsaatigalugit. Aamma Munck Gruppenip sulisuminik Ilulissanukartitsinissaanut tamanna sunniuteqarsinnaavoq, Johannus Egholm Hansen nassuiaavoq.
Timmisartuusseqqusinnginneq nalornititsivoq, tamatumali Kalaallit Airports allamik pilersaarusiornissaanut tunngavississimanngilaa.
- Suliassat taamatut annertutigitillugit soorunami piffissaliussaq malinneqarsinnaanersoq nalilersorneqartuartarpoq. Coronap ajornartorsiortitsinera maanna suli tamatumunnga sunniuteqanngilaq, siulersuisuni siulittaasoq ilisimatitsivoq.
Sanasut Qaqortumi mittarfiliornerup qanoq akeqarnissaa naatsorsuleruttorpaat. Taakku corona apeqqutaatinnagut apriilip qaammataani påskereernissaanut neqeroorutissaminnik suliaqarnissamut piffissaliussap sivitsorneqarnissaa qinnutigisimavaat.
Akit appasinnerulissasut?
Coronap ajorartorsiortitsinera pissutaalluni akigititassat ajortumik sunnerneqassappat?
- Taamaattoqarnissaa ilimaginngilara. Akerlianik sanasut suliassanik kinguartitsinngikkaagamik taamaatitsiinnartarput. Tamanna eqqarsaatigalugu, imaassinnaavoq suliassaq akikinnerulersoq, sanasummi nutaanik suliakkinneqarnissartik perusuttupilussuussavaat, Johannus Egholm Hansen, timmisartuusseqqunninnerup qanoq sivisutiginissaa aamma coronap qanoq sivisutigisumik ajornartorsiortitsinissaa apeqqutaasut erseqqissaalluni oqarpoq.
- Sanaartornissamummi avataanit sulisussat pisariaqartinneqarput, siulersuisuni siulittaasoq tunngavilersuivoq.