Siulersuisuni ilaasortat taarseraassimaqisut

Ukiumi qaangiuttumi Namminersorlutik Oqartussat ingerlatseqatigiiffiutaanni katillutik quliusuni siulersuisut katitigaanerat allanngortinneqarsimapput. Ilaat tupaallannarnerullutillu allanit tusagassiuutitigut sammineqarnerusimallutik.

Ilaatigut Visit Greenlandip siulersuisuini siulittaasoq Maliina Abelsen Annetter Lindsimik Sisimiuneersumik taarserneqartussaagami nuannarinngeqisaminik soraarniuteqaqquneqarsimavoq. Tamanna pivoq apriilip aappaani immikkut ittumik ataatsimeerusarnermi.

Ilanngutassiaq atuaruk: Maliina soraarsitsineq pillugu: Politikikkut aalajangiineq

Ulloq taanna aamma Illuut A/S-imi taarsiisoqarpoq, tassani Kalaallit Airports-imi pisortaasimasoq siulittaasunngortinneqarpoq, Klaus Jukku Mølgaard taarserlugu siulersuisuni siulittaasunngortinneqarami.

Ikiuunninnut qujanaq

Kingusinnerulaartukkut apriilip – 24-ani - Demokraatit siulittaasorisimasaat Niels Thomsen Namminersorlutik Oqartussanit Kalaallit Airportsip siulersuisuinut siulittaasunngortinneqarpoq, tamannalu timmisartoqarfiliassarsuit inatsisigitut akuersissutigineqarnerannut ”ikiuunneranut qujassutitut” isigineqarluni.

Ilanngutassiaq atuaruk: Kielsenip Niels Thomsen siulersuisuni atuuffimmik pilerinartumik tunigaa

Ukiup ingerlanerani kingusinnerusukkut aamma nikittoqarpoq, tassani Kalaallit Aipritsip siulersuisuini siulittaasoq Johannus Egholm Hnasen tunuarniarluni aalajangermat. Taassuma taartaata Kjeld Zacho Jørgensenip Air Greenlandimi siulittaasutut atuuffini qimattariaqarsimallugu, siulittaasup tullia Bodil Marie Damgaard siulittaasunngortinneqarpoq.

Air Greenlandimi siulersuisut ilaasortaat ataatsimik amigaateqalermata, Peter Grønvold Samuelsen tupaallaatigineqartumik ilaasortanngortinneqarpoq, KNI-mi naatsorsuutit allanngortiterneqartarsimanerannik pasilliisoqarsimanera tunngavigalugu Deloitte misissuisoq paasinarsereeraluartoq.

Takussutissartaat

Namminersorlutik Oqartussat ingerlatseqatigiiffiutaanni siulersuisut taarserneqarsimasut tamarmiusut tulliullugu takussutissartaat takutinneqarput. Malugiuk: siulersuisuni ilaasortassatut sulisunit toqqarneqarsimasut takussutissani ilaanngimmata.

Air Greenland A/S

Ulloq 12. november 2020 immikkut ittumik ataatsimeersuarneq: Siulersuisuni siulittaasoq Kjeld Zacho Jørgensen Air Greenlandip siulersuisuinit tunuarpoq, tassani siulittaasup tullia Bodil Marie Damgaard siulittaasunngorluni, siulersuisunilu ilaasortaq Steen Jensen siulittaasup tulliatut atuutilerluni, aamma Peter Grønvold Samuelsen siulersuisuni ilaasortanngortinneqarpoq.

Kalaallit Airport Holding A/S

Ulloq 12. november 2020 immikkut ittumik ataatsimeersuarneq: Kjeld Zacho Jørgensen ingerlatseqatigiiffiup siulersuisuini siulittaasutut atuutilerpoq, Johannus Egholm Hansen ulloq 30. september 2020 siulersuisuni siulittaasutut tunuarmat - Christian Berg piffissami pineqartumi siulittaasuugallarsimavoq.

Ulloq 24. april 2020 immikkut ittumik ataatsimeersuarneq: Aviâja Lyberth Lennert aamma Jákup Sverri Kass ingerlatseqatigiiffiup siulersuisuinit tunuarput, taakkulu taarserlugit Niels Thomsen aamma Christian Berg ingerlatseqatigiiffiup siulersuisuini ilaasortanngorlutik.

Visit Greenland A/S

Ulloq 2. april 2020 immikkut ittumik ataatsimeersuarneq: Siulersuisuni siulittaasoq Maliina Abelsen siulersuisuni ilaasorta Johanne Margrethe Bech aamma Erik Bjerregaard peqatigalugit siulersuisuni ilaasortaajunnaarput. Taakku taarserlugit Morten Nielsen, Mia Scheel aamma Pitsi Høegh ilaasortanngorlutik. Akunnittarfiutilik Annette Grønkjær Lings ingerlatseqatigiiffiup siulersuisuini siulittaasunngortinneqarpoq.

Great Greenland A/S

Ulloq 7. maj 2020 ileqquusumik ataatsimeersuarneq: Siulittaasup tullia Tommy Ege Christensen siulersuisuni ilaasortaajunnaarpoq, Stefa Dirk Buchilu siulersuisuni ilaasortanngorluni.

INI A/S

Inga Dora G. Markussen nammineq kissaateqarnermigut ulloq 2. juni 2020 ingerlatseqatigiiffiup siulersuisuini ilaasortaajunnaarpoq. Taassuma taartissaanik ilaasortanngortitsisoqanngilaq. Tamannalu pillugu immikkut ittumik ataatsimeersuartoqarani, Inga Dora Markussenimi Inuussutissarsiornermut Ingerlatseqatigiiffinnullu Aqutsisoqarfimmi allassimajunnaartinneqaannarpoq.

NunaOil A/S

Ulloq 28. maj 2020 ileqquusumik ataatsimeersuarneq: Siulersuisuni naalagaaffik sinnerlugu ilaasortaqPeter Helmer Steen ilaasortaajunnaarpoq, Susanne Juhlilu naalagaaffik sinnerlugu ilaasortanngorluni.

KNI A/S

Ulloq 12. august 2020 ileqquusumik ataatsimeersuarneq: Siulersuisuni ilaasortaq ingerlatseqatigiiffiup siulersuisuini ilaasortaajunnaarpoq, Søren Hald Møllerilu siulersuisuni ilaasortanngorluni.

Sikuki Nuuk Harbour A/S

Ulloq 28. maj 2020 ileqquusumik ataatsimeersuarneq: Siulersuisuni ilaasortat Berit Koertz, Lars Borris Pedersen aamma Christine Tønnesen siulersuisuni ilaasortaajunnaarput, taakkulu taarserlugit Heidi Jeremiassen, Ivalu Kleist aamma Steen Montgomery-Andersen ilaasortanngorlutik.

Illuut A/S

Ulloq 7. maj 2020 ileqquusumik ataatsimeersuarneq: Jørgen Aqe Møllerip siulersuisuni ilaasortanngortinneqarneratigut ingerlatseqatigiiffiup siulersuisuini ilaasortat ataatsimik ilallugit sisamanngortinneqarput.

Ulloq 2. april 2020 immikkut ittumik ataatsimeesuarneq: Siulersuisuni siulittaasoq Klaus Jukku Mølgaard ilaasortallu Birthe Flæng Møller aamma Inge Bisgaard ilaasortaajunnaarput. Steffen Ulrich Lynge siulersuisuni siulittaasunngorpoq, Nikolaj Ezikiasenilu aamma Finn Olesen siulersuisuni ilaasortanngorlutik.

Royal Arctic Line A/S

Ulloq 7. maj 2020 ileqquusumik ataatsimeersuarneq: Heidrun Jonsdottirip siulersuisuni ilaasortanngortinneqarneratigut ingerlatseqatigiiffiup siulersuisuini ilaasortat ataatsimik ilallugit arfinilinngortinneqarput.