Sisorartitsisarfiliornissaq Naalakkersuisunit kommunimiillu itigartitsissutigineqarpoq
Takornarianut sisorartitsisalernissamut immikkut akuersissuteqalerneq Maniitsup eqqaani annertunerusumik sunniuteqarnavianngitsoq, Naalakkersuisut naliliipput.
Naalakkersuisut Qeqqata Kommunia suleqatigalugu Maniitsup avannaani Sermersuarmi takornarianut sisorartitsisarfiliornissamut akuersissuteqalernissaq itigartitsissutigaat.
Namminersorlutik Oqartussat taama naatsumik nalunaaruteqarput.
- Ataatsimut isiginnilluni aalajangiisoqarpoq, naliliiniarnermi isiginiarneqarsimasoq tassaavoq kisermaassilluni sisorartitsisoqarsinnaanera annertunerusumik ingerlatsitsisoqalernissaanik naatsorsuuteqarfigineqanngimmat, aalajangernermut nalunaarummi allassimavoq.
Takornarianut sammisassanik akuersissuteqartoqartillugu sumiiffimmi aalajangersimasumi kisermaassilluni sammisassaqartitsisoqalersinnaavoq. Naalakkersuisut naliliipput takornarianut sammisassaqartitsinissanut akuersissutit aatsaat tunniunneqartassasut sumiiffimmi annertunerusumik ingerlatsitsisoqarnissaanik aningaasaliisoqarnerulertoqarnissaanillu naliliisoqarsinnaappat.
Innuttaasut suliffeqarfiillu Maniitsup eqqaani Sermersuarmi takornarianut sisorartarfiliornissamut akuersissummik qinnuteqarnissamut Naalakkerusisut 2019 naalersoq kaammattuuteqsarput.
Namminersorlutik Oqartussat Sermitsiaq.AG-mut ilisimatitsipput akuersissuteqarnissamut qinnuteqaatit pingasut tiguneqarsimasut. Suliffeqarfiit sorliit innuttaasulluunniit kikkut qinnuteqartuusimanersut ilisimatitsissutigineqarsinnaanngilaq, unammilleqatigiinnissaq pillugu ingerlatsinermi nipangiussimasussaatitaaneq atuummat.