Sisorartartut aputissaaleqipput
Nuummi aputeqanngittuarsinnarpoq. Aputeqannginnera malillugu sisorartartut sungiusarnertik ingerlattariaqarpaat.
Ullorsiut malillugu novemberip aallaqqaataavoq, Nuummili qaqqarsuit nuui kisimik aputeqarput. Silasiut malillugu qerinnangajalluni plusgrademiippoq. Illoqarfillu aputeqanngivimmat løjpeliuutit, tassa sisorartartunut aqqutiliuutit, suli aallartinngillalluunniit. Nuummi sisorartartut peqatigiiffiani, NSP, sungiusaasartoq Poul Petersen Sermitsiaq.AG-mut ilisimatitsivoq aputeqannginneq sisorartartut ullut tamarluinnangajaasa oqaloqatigiissutigisaraat.
- Sisoraatit ullormut atisimanngikkutsigit, taava sungiusarnissaq pingaaruteqartoq annaassavarput, oqarpoq.
Nunatsinni sisorarluni Aasianni pissartanngorniuttoqarnissaanut qaammaterpassuugaluartut, taamaattoq pissartanngorniunnissamut NSP sungiusalereerpoq.
- Pissutsit nalinginnaasuutillugit novemberi aallartiliinnartoq sisoralereertaraluarpugut. Ukioq manna sisoraatigut suli piareersanngilagut, Poul Petersen oqarpoq illarlunilu.
Sungiusarneq nalimmassarneqarpoq
NSP ukioq kaajallallugu sungiusartitsisarpoq. Upernaakkut aput aakkaangat aasakkullu sungiusarneq illup iluani ingerlanneqarnerulertarpoq, silamilu arpattoqartarluni. Sisoraatilli atorlugit orlunaveersaarsinnaaneq sungiusarluarneqarnerusarpoq.
- Sungiusarnitsinni ajaappiarsorneq maanna ingerlanneruarput. Silami arpannermi atortarpagut, taamaasilluta timi sisoraateqarnermut assigusumik sungiusartarlugu. Kisianni ilumoorpoq, pissartanngorniunnissamut sungiusarnermi sisorarsinnaaneq pingaaruteqartorujussuuvoq, Poul Petersen oqarpoq.
- Apinngiinnarpat pissartanngorniunnissani angusagut sunnerneqarsinnaapput. Tamanna takoreernikuuarput. Kisianni isumalluarpugut, ukiullu naannginnerani sisorarsinnaanerput naatsorsuutigalugu, NSP-mi sungiusaasoq oqarpoq.
NSP-mi sungiusaasut sapaatip akunnera ataaseq missaa qaangiuppat pikkorissartinneqassapput. Illup iluani sungiusaaneq ajaappiarsorlunilu, Thorax-imik taaneqartartup, sungiusaaneq pikkorissassutigineqassaaq.
Poul Petersen naapertorlugu Nuup tunuatungaani Quassussuup nalaani aputeqarnerusarnera atorluarlugu, NSP sungiusariartarnissaa ilimanarsinnaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...