Sisoraaserlutik ooqattaasartartut inuusuttut Italiami misilittakkanik katersisut
Sisoraaserlutik ooqattaasartartut inuusuttut nunatsinneersut marluk Italiami Biathlonzentrum Martellimi sungiusaqatigiinnermit misilittagarpassuarnik pissarsisimapput. Maanna Sasja Joelsenimit aamma Inuk Slettemarkimit tikeraarneqannginnerminni pisariaqartitaminnik unillatsiarallarput.
Marika Magnussen aamma Max Kreutzmann.
Taakkua tassaapput kalaallit sisoraaserlutik ooqattaasartartut inuusuttut marluk, sungiusaasortik Øystein Slettemark peqatigalugu Den Internationale Biathlon Unionip (IBU) aamma Den Internationale Olympiske Kommitteep (IOC) Italiami Biathlonzentrum Martellimi sungiusaqatigiissitsinerannut peqataaqqammersut.
Tassani sisoraaserlutik ooqattaasartartut inuusuttut katillugit 36-t naalagaaffinnit assigiinngitsunit 19-init ikinnerunngitsuneersut aamma peqataasimapput.
Marika Magnussen aamma Max Kreutzmann sisoraatinik ujakkaallaqqissuupput, sisoraaserlunili ooqattaasarnermi nutaraangaatsiarlutik. Taamaakkaluartoq Nuummi sisoraaserluni ooqattaasartartut sungiusartarfittaavanni luftgeværimik aasarli akuttunngitsumik sungiusartarsimapput.
Sungiusaasut misilittagartuut
Taama nunatsinni sisoraaserlutik ooqattaasartartut kattuffiannit, Grønlands Biathlon Forbundimit, tusagassiuutitigut nalunaarummi allassimasoqarpoq.
Tassani atuarneqarsinnaavoq, sungiusaqatigiinneq sungiusaasunit misilittagartoorujussuarnit qaffasinnerpaamilu timersortartuusimasunit siulersorneqarsimasoq, ilaatigut Domenik Windishimit, OL-imi 2022-mi bronzennattumit, aamma Canadami Schweizimilu nunanut allanut unammisartut sungiusaasorisimasaannit.
Grønlands Biathlon Forbund paasissutissiivoq, IBU aamma IOC sungiusaasunut aningaasartuutinik najugaqarnermullu aningaasartuutinik tamanit matussusiisimasut naalagaaffinnullu tamanut angalanermut tapiissuteqarsimasut
Grønlands Biathlon naapertorlugu, tamanna IBU-p aamma IOC-ip naalagaaffinni mikinerusuni sisoraaserluni ooqattaasartarnerup ineriartortinnissaanut tapersersuiumanerannut ineriartornissamullu periarfissikkumaneranut ersiutaasoq, taakkua taamaalillutik qaffasinnerpaamilerniassammata.
Pisariaqartitaminnik unillatsiartut
Unamminernut marlunnut angusanut taarsiullugu pitsaasumik naammassinninnissaq pingaarnertut isiginiarneqarsimagaluartoq, Grønlands Biathlon Forbundimit Marika Magnussenip sisoraaserluni ooqattaasarnermi unamminivimmut peqataanermini siullerpaami peqataasut 17-it akornanni normu 7-itut kusanavissumik inissisimanera taanngitsoorusunneqanngilaq.
Grønlands Biathlon Forbundip ilanngullugu nalunaarutigaa, Max Kreutzmann aamma Marika Magnussen Italiami pisariaqartitaminnik unillatsiaqqaartut sapaatip-akunnerata naanerani Martellimi IBY Junior Cupimi Sasja Joelsen aamma Inuk Slettemark peqatigalugit Kalaallit Nunaat sinnerlugu peqataannginnerminni.
Tassani - Grønlands Biathlon Forbund naapertorlugu – inuusuttunut sisoraaserlutik ooqattaasartartunut sapinngisamik annerpaamik ilikkagaqartitsinissaq pingaarnertut isiginiarneqaqqissaaq.
- Nunarsuarmi inuusuttuaqqat (23-t angullugit ukiullit) pikkorinnerpaartaannut unammisussaammata, Grønlands Biathlon Forbund pissusissamisoortumik inuusuttut angusarissaarnissaannik naatsorsuutigisaqanngilaq, nalunaarutigineqarpoq.