SIS: Kim Kielsen peqataatinneqarnerussaaq

Siumup nuna tamakkerlugu ataatsimeersuarnerani neriorsuutigineqartut Siumup Inuusuttunut Suleqatigiiffianit ujartorneqarput. Siumup inuusuttaasa isornartorsiuinerat partiimi siulittaasumit Erik Jensenimit akissuteqarfigineqarput.

Siumup Inuusuttunut Suleqatigiiffiata partiimi ingerlatsisunut isornartorsiuipput, tassani partiip nuna tamakkerlugu ataatsimeersuarnerani neriorsuutigineqarsimasut ujartorneqarlutik.
Kim Kielsen, partiimi Inatsisartunut qinersinermi qinigaanerpaajusoq, Siumumi aamma peqataatinneqarnerulernissaa kissaatigineqarpoq.

- Ajoraluartumik tusarnaarnissamik, peqataatitsinissamik tatiginninnissamillu neriorsuutigineqarsimasut tassaaginnalerput oqaatsit kusanartut imaqanngitsut, pissutigalugu ullumikkut partiip siuttoriligai aalajangiussereertumik nipeqarlutik tusagassiutitigut saqqummertalerput allaat partiip iluani ilaasortanit eqqartorneqarsimanngittut ilanngullugit saqqummiunneqartalerput, SIS-imi siulittaasoq Amalie Bourup tusagassiutinut nalunaarummi allappoq.

Pissaaneqarniuttoqarunnaassaaq

Isornartorsiuineq partiimi siulittaasumit Erik Jensenimut akissuteqarfigineqarpoq.

- Inuusuttut isummernerat tusaavakka, taamaattoq ersarissaassutigissavara qulaatigut Siumumi aqutsineq qimanneqarnikuuvoq. Naligiimmik tamatta akuutinneqarluta, naalaarsinnaassuseqarama, ajunnginnerpaamillu aaqqiissuteqarnissaq aallaavigalugu sulinikka ingerlattuarpakka, Erik Jensen Sermitsiaq.AG-mut isornartorsiuisoqarnera oqaaseqarfigaa.

Partiimi pissaaneqarniunneq maanna qaangiuttariaqartoq isumaqarpoq.
- Tamanna parteeqatinnut tamanut kaammattuutigissavara. Siulersuisut sapaatit akunneri tamaasa mingutserneqartuarput, inuit ataasiakkaalli pineqarnerat naammatsiffigaara, maannamiillu siumut isigaluni ingerlaqqittoqartariaqalerpoq. Innuttaasut pillugit sulissaagut inuit qanimut suleqatigalugit, tamanna toqqammavigalugu sulissaagut, oqarpoq.

Kim Kielsen Siumup ilaasortaasa akornanni Inatsisartunut qinersinermi taaguunneqarnerpaanera pissutaalluni partiimi peqataatinneqarnerusariaqartoq SIS isumaqarpoq.

Qinersineq siulittaasumut qinersinerunngitsoq

- Isumaqarpugut qinersinerup inernera ataqqineqarluni tusaaneqartariaqartoq tassami Siumumi qinersisit sisamararterutaat eqqartorneqarput, Amalie Bourup piumasaqarpoq.
SIS-ip piumasaqaataanut Erik Jensen ima akissuteqarpoq:

- Kim Kielsen allatuulli ilaasortatut akuuvoq, Inatsisartut gruppianni peqataasarpoq. Ataatsimiinnissanut pisussanullu tikilluaqqusaajuaannarpoq, nammineq inuttaata ilaassanerluni imaluunniit ilaassannginnerluni aalajangertarpaa, tamanna akuleruffigineq ajorparput. Naligiimmik allatuulli pineqarpoq.

- Imatut oqaatiginiarneqarpoq Kim Kielsen qinigaanerummat Siumumi siulittaasunngussasoq. Partii piuvoq malittarisassaqartoq, taakku aallaavigalugit sulineq ingerlavoq. Inatsisinik suliaqartut tassaapput sinerissami immikkoortortaqarfigut. Immikkoortortaqarfiit toqqagaraat qanoq ingerlatsisoqassanersoq. Taamaattumik aalajangerneqarsimasut ataqqineqaqqissaarlutillu malinneqaqqissaassapput. Inatsisartunut qinersineq tassaanngilaq partiip siulittaasussaanik qinersineq, Erik Jensen oqarpoq.

Powered by Labrador CMS