Sisimiut: Napparsimmaviup allilerneqarnera 114 millionit koruuninik akeqassaaq
Sisimiuni peqqinnissaqarfimmi maanna pissutsit nakorsiartunut naleqqukkunnaarsimapput, napparsimmavimmilu sulisunut pitsaasumik suliffimmi avatangiiseqarnissamut unammillernartoqartitsilluni. Allilerineq qaammammi matumani aallartissaaq.
Inatsisartut Aningaasaqarnermut akileraartarnermullu Ataatsimiititaliaata 2022-imi juunip ulluisa 29-ianni Peqqinnissaqarfik Qeqqani qitiusumik napparsimmaviup allanngortiterlugulu allilernissaanut katillugit 114 mio. koruuninik atugassiinissamut Naalakkersuisut innersuussutaat akuersissutigaat, Namminersorlutik Oqartussat tusagassiuutinut nalunaarutaanni tamanna oqaatigineqarpoq.
Sisimiuni Peqqinnissaqarfik Qeqqani qitiusumik napparsimmavik ullutsinnut naleqqukkunnaartoq nutartertariaqartorlu nalilerneqarpoq. Allanngortiteraluni allilerinikkut pissutsit ullutsinni eqqiluisaarnissamut piumasaqaatinut naapertuuttunngorlugit pitsaanerulersinneqassapput.
Ukiuni marlunni allilerineq
- Sisimiuni Peqqinnissaqarfik Qeqqani qitiusumik napparsimmavik piffissami sivisuumi nutartigassaasimavoq, peqqissutsimut naalakkersuisoq Mimi Karlsen (IA) nalunaarummi oqarpoq, peqatigisaanik Sisimiuni innuttaasut qitiusumillu immikkoortumi innuttaasut allat Peqqinnissaqarfimmik naapitsinerup toqqissinartutut misiginissaa pingaaruteqarnerarpaa.
Nalunaarummilu tassani ineqarnermut naalakkersuisoq, Erik Jensen (S), Sisimiuni Peqqinnissaqarfik Qeqqani qitiusumik napparsimmavimmik allanngortiteralunilu allilerinissamik piviusunngortitsineq suliniutissatut salliunneqartoq oqarpoq.
Allilerineq Sisimiuni BJ Entreprisimit suliarineqassaaq. Qaammat una sanaartortoqaleriissaaq sanaartornerullu 2024-ip qiteqqunnerani naammassinissaa naatsorsuutigineqarpoq.
Init nutaaliat
Napparsimmavik nutaanik nutaaliaasununik- ilaatigut pilattaaveqalissaaq, ernisarfeqalissaaq, piartortunut immikkut aaqqisuussanik ineqalissaaq kigutileriveqalerlunilu.
Qitiusumik napparsimmavimmi peqqissaasutut pisortaasup Nukánguak´ Heilmannip, immikkoortortap uninngaviusartup nutarterneqarnissaa taamaalillunilu napparsimasunut atugassarititaasut malunnaatilimmik pitsannguuteqarnissaat nuannaarutigaa.