Sisimiut: Meeqqerivimmut serlersaarinerit
Igalaanik aserorterisoqaqattaartoqarnera pissutaalluni akiligassat 30.000 koruuninit ikinnerunngitsunik akiligassaqartoqalerpoq
Qaammatit marluk iluanni Sisimiuni meeqqeriviup Naja/Aleqap igalaavi quleriarlutik aserorterneqarsimapput.
- Kingullermik ataatsikkut arfinillit sequminneqarput. Pisoq tujorminarpoq, tassami suliffeqarfipput ulluunerani meeqqanut ukioqanngitsuniit atualertussanut paaqqinnittarfiummat, meeqqerivik Naja/Aleqami pisortaq Martha Lyberth Jensen Qeqqata Kommunianut nittartagaanut oqarpoq.
Tamanna atuisunut toqqissisimannginnermik pilersitsivoq aammalu meeqqanit paasiuminaatsinneqarluni toqqissisimaffitsik sooq taamannak serlersaarfigineqarluni tujorminartunngortinneqarnersoq.
Akiligassarpassuit
- Igalaat taarsersortinneri aningaasasnik annertuunik naleqartarput, sulilu taarsigassartaqarlutik. Aningaasat maannakkumut igalaanik taarsersuinermut aammalu immikkut eqqiaatitsisariaqarnermut atukkagut 30.500 kr. angoreerpaa. Taakku aningaasat pitsaanerusumik atorneqarsinnaagaluit iluarsaartuussinernut atortariaqarsimavagut.
- Innuttaasut kaammattorusunnaqaat nalunngisaqartillutik tusagaqarsimagaangamilluunniit politiinut saaffiginnittaqqullugit, aningaasammi pitsaanerusumut atorsinnaagaluaratsigit meeqqanut suliffeqarfitsinnullu iluaqutaasussanut, Martha Lyberth Jensen oqarpoq.