Sisimiut: Meeqqat pingasuugaangata ataaseq tusillakkiartortarpoq
Ilisimatusarluni misissuinerup takutippaa Sisimiuni nunaqarfiinilu atuartut pingasuugaangata ataaseq tusilarneruleriartortartoq. Meeqqat 10 procentii ima tusilartigaat, tusartaateqarunik iluaqutiginerussagaluarpaat.
Sisimiuni, nunaqarfinnilu Itillermi aamma Sarfannguani ilisimatusarluni misissuinerit takutippaat meeqqat 29 procentii annerusumik minnerusumilluunniit tusillakkiartortartut. Meeqqat 10 procentii ima tusilartigipput, allaat tusartaateqarunik iluaqutiginerussallugu.
Ilisimatusarluni misissuineq Rigshospitalimi siutit, qinngap qungatsikkullu pilattaasarfimmit, ilisimatusarnermik suliaqartumit Jakob Schmidt Jensenimit ingerlanneqarpoq.
Jakob Schmidt Jensen nassuiaavoq meeqqat tusaasaat misissussallugit pingaaruteqarluinnartoq, tusilarneq atuarnermi akornutaaleratarsinnaasarmat.
- Pingaaruteqarluinnarpoq, tusilarnerugaanni atuarfik unammillernarluinnarsinnaammat. Atuartup atuartitsinermi malinnaaniarnera killeqarsinnaavoq, ikinngutillu akornanni peqataaniarnera unammillernartoqarsinnaalersarluni. Tamanna inersimasunngornermi unammillernartoqartitsilersinnaavoq, suliffittaarniarnermilu aamma, Sermitsiaq.AG-mut oqarpoq.
Meeqqat ikinnerusut tusilartarput
Sisimiuni nunaqarfinnilu marlunni 5. klasseniit 10. klasse ilanngullugu atuartut katillugit 185-it misissuinermi peqataasimapput. Taakkunannga 54-it annerusumik minnerusumilluunniit tusilarput. 18-illu ima tusilartigaat tusartaateqartariaqaraluarlutik. Misissuinermi peqataasut arlaannaalluunniit tusartaateqanngillat.
- Sisimiuni Nuummilu misissuinerit siulliit takutereerpaat Kalaallit Nunaanni meeqqat nunarsuup sinneranut sanilliullugu tusilarnerusut. Uagulli misissuinitta inernerisa takutippaat Kalaallit Nunaanni atuartut akornanni tusilarnerusut ikilerialaarsimasut. Peqqissutsimulli suli ajoqutaalluinnarpoq atuartut tusilartut ikiorserneqartannginnerat, Jakob Schmidt Jensen oqarpoq.
Nunat tamalaat akornanni misissuinerit takutippaa meeqqat tallimaagaangata ataaseq tusillakkiartortartoq. Tusillakkiartornermi meeqqap oqaatsitigut ineriartornera, ineriartornera, ilikkarniartarnera allanullu attaveqartarnera akornuserneqalersarpoq.
Jakob Schmidt Jensen oqaluttuarpoq Rigshospitalimi siutit, qinngap qungatsillu nakorsaqarfia nutaamik misissuissalluni piaareersaasoq, meeqqat tusartaatilersorneqartillugit iluaqutaasussanik misissuissalluni.
- Maanna misissuinermit inernerit takutippaat Kalaallit Nunaanni atuartut akornanni tusillakkiartortartut qanoq amerlatigipajaarnersut. Tullinnguuppoq meeqqat tusilarnerusut ikiorsernissaannut periarfissanik misissuissalluta. Tusartaatit meeqqanut atorneqarsinnaasut qanoq iluaqutaatigisinnaanersut maanna misissussallugit piareersaasiorpugut, Sermitsiaq.AG-mut oqarpoq.