Sisimiut: Islandimiut aningaasaliisartut takornariaqarnermut aningaasaliinissamut piareersimapput
Islandimiut aningaasaliisartut Sisimiut eqqaani aningaasaliissagunik piumasaqaat ersarippoq: Sisimiut Kangerlussuullu akornanni aqqusiortoqaqqaassaaq
Islandimi takornarialerisuni annerpaat ilaat Arctic Adventuremi piginneqataasut Sisimiuni takornariaqarnerup tungaatigut annertuumik aningaasaliinissamut piareeqqapput.
- Suliniutinut aningaasaliinissamut annertussuseq 250 mio. danskit aningaasaannik annertussuseqarpoq, taassumallu saniatigut ilisimasat aamma misilittakkat malillugit periutsit Islandimeersut takornariaqarnermut suliniutit ingerlatissavaat unnuisarfittalerlugit, angallassinerit aamma misigisassarsiornermut allarpassuarnullu.
Destination Arctic Circle tusagassiuutinut nalunaarummi taama allappoq.
Suleqatigiinneq
Wings Capital hf. nunatsinneersut Sikumiut ApS suleqatigalugu ineriartortitsipput ukioq naallugu takornariartarfissamik Aqqutikitsup sermiani.
- Wings Capital hf takornariaqarnerup tungaatigut nunap immikkoortortatsinni aningaasaleerusummat nuannaarutigeqaarput, aamma nunaqavissut suleqatigineqarnissaat aallaavigimmassuk, takornariaqarnermut siuannersorti Jesper Schrøder, Destination Arctic Circlemiit oqarpoq.
Aqqusineq sanaartorneqartariaqarpoq
Tamanna piviusunngussappat Kangerlussuarmiit Sisimiunut aqqusinissap piviusunngortinnissaa pisariaqarpoq, taama allappoq Wings Capital hf, aammattaaq Kangerlussuup mittarfia kikkunnit tamanut timmisartuussisinnaasunut ammaffigineqartariaqartoq, takornarissat ajornannginnerusumik apuussinnaassammata aammalu piffissaq eqqorlugu ingerlaqqissinnaaniassammata.
- Nuannarutigeqaarput Kangerlussuup mittarfia atatiinnarneqalermat, nunatsinnut pingaarutilerujussuummat aammalu takornariat tikissinnaasut nunap immikkoortortatsinni amerlammata, aamma Island-imi takornarialerisut annerpaat ilaat erseqqissaanermut peqataalerput, takornariaqarnermut siuannersorti Jesper Schrøder, Destination Arctic Circleimiit oqaaseqarpoq.