Sisimiut: Angut ujaarineqartoq suli tigusarineqanngilaq

Sisimiuni politiit angut inuusuttoq suli ujaaraat

Frederinnguaq Svendsen Sisimiuni politiinit suli ujaarineqarpoq, politikommissæri Karl Jørgen Lennert Sermitsiaq.AG-mut ilisimatitsivoq.

Ujaarineqartoq 22-nik ukiulik pingasunngormat napparsimavimmiitilluni politiinit qimaavoq.

- Ulloq tamaat atorparput ujaaralugu. Innuttaasunit saaffigineqartaraluarpugut sumiissimasinnaaneranik ilisimannittunik, ornigukkaangatta orniguffitsinniinneq ajorpoq, Karl Jørgen Lennert oqarpoq.

Politiit saaffigineqassapput

Angut ujaarineqartoq nakuusersimasutut pasineqartoq politiit ilisimatitsissutigaat, taamaattumik angut sumiissusersineqarpat politiit erngertumik nalunaarfigeqquneqarput.

Frederinnguaq Svendsenip sumiinneranik ilisimannittut politiinut sianeqquneqarput telefonimut 701322-imut imaluunniit 701448-mut.

Powered by Labrador CMS