ujakkaarneq
Sisimiut Winter Games kingorna: Tallimat AWG-ernissamut akuerisaapput
Arpattartut 17-it toqqakkat akornanni tallimaasut Nuummi marsimi AWG-ernissaminnut akuerineqarallarput. Pingasut allat suli periarfissaqarput
Ujakkaartartut 17-it Arctic Winter Gamesimut (AWG) anngunnissaminnut periarfissaqartut aamma arpattartut juniorit Sisimiunit illoqarfiut nammineq Winter Gamesiani 7-13. decemberip akornanni katersuupput.
Taakkunani ataaseq Arctic Winter Gamesimut peqataanissaminik siornali akuerisaareerpoq, tassaasoq Bjarne Hansen.
AWG-mut peqataasussatut toqqarneqartut ukuugallarput:
- Aka Olsen, Sisimiut, arpattartoq, 1998-1999
- Minik Nikodemussen, Maniitsoq, arpattartoq, 2000-2001
- Peter Johansen, Aasiaat, arpattartoq, 2000-2001
- Bjarne Hansen, Sisimiut, arpattartoq, 2000-2001
- Anne Mette Noahsen, Sisimiut, arpattartoq, 2000-2001
Piukkunnaatillit kingusinnerusukkut toqqarneqarsinnaasut ukuupput:
- Hannah Olsen, Ilulissat, arpattartoq, 1998-1999
- Arnatsiaq Olsen, Sisimiut, arpattartoq, 2000-2001
- Nadia Jensen, Aasiaat, arpattartoq, 2002-2003
Sisimiut Winter Gamesertoqarnerani sungiusaanermut pikkorissaasoqarpoq, sungiusartoqarpoq, minnerunngitsumillu pingasoriarluni AWG-mut annguinniulluni arpattoqarpoq.
Program aallartikkaat
- Uku inuusuttut ujakkaartartut eqimattat, aappassaanik katersuutsippagut. Siullermik aasaq rulleskinik GM-ertoqarmat katersuupput. Taamani arpattartunut pikkorissarnernik aallartitsivugut, tassani sungiusarnermut akisussaaffimmik nammineq tigusinissamik teorii aammalu sulisaaseq ilinniarpaat, nunanut allanut unammisartunut sungiusaasoq, Øystein Slettemark nassuiaavoq.
- Ujakkaartartut aasaq ilikkarsimasaat sapaatip-akunnerani kingullermi uterfigeqqippagut, taamaalillutik maanna sungiusarnermut aamma aasakkut ukiukkullu sungiusarnermut pilersaarusiornermut, nerisaqarnermut, qasuersaarnermut, psykologiimut, atortoqarnermut, unamminissamut piareersarnermut allarpassuarnullu pikkoriffeqalerput, taanna oqarpoq.
Siuariarneq
Katersuunneq pikkorissarnerlu sungiusaasup ikiortaanit, Andrie Sørensenimit, Salik Olsen peqatigalugu ingerlanneqarpoq.
Sisimiut Winter Games ukioq manna iluatsilluarpoq, sungiusaasoq erseqqissaavoq. Aputeqarneruleriartorneralu ilutigalugu siuariartortoqarpoq.
- Ujakkaartartut tamarmik siorna GM-ernermit aamma rulleski-GM-ertoqarneranit siuariaateqarpoq. Ataasiakkaat piffissami tassani sungiusarluarsimapput, tamannalu angusaasa ersersippaat, Slettemark oqarpoq.
Atuaruk: Suli aallartitsinnatik kinguaqqareersut