Sisimiut nutaamik aalisarnermi ilinniakkamik eqqanaarneqarpoq
Qinnuteqarfiup siulliup takutippaa Sisimiuni Issittumi aalisarnerup iluani ingeniørinngorniarfimmi nutaami ilinnialertussat naammattut
Kalaallit Nunaanni ilinniagaq nutaaq Issumi aalisarnerup iluani ingeniørinngorniarfik pilersaarutitut septembarimi ukioq atuarfiusoq nutaaq aallartippat aallartissavoq, ilinniarnermi pisortaq Nina Qvistgaard DTU Aqua-meersoq taama oqaluttuarpoq, Nina ilinniakkamut nutaamut Issittumi Teknikkikkut Ilinniarfimmiittussamik suliaqartuuvoq.
Qaffasinnerusunik ilinniagaqarfinnut kvote 1 tunngavigalugu qinnuteqarnissamut killigititaasoq tallimanngormat juulip tallimaanni qaangiuppoq – ilinniartullu allaffeqarfiata maanna qinnuteqaatit misissorsimavaat. Qinnuteqaatinik misissuinerup siulliup takutippaa ilinniakkap aallartinnissaanut ilinnialertussat naammattut, naak immaqa aallarteqatigiittussat amerlavallaanngikkaluartut.
- Aatsaat maajimi ilinniagaq akuerineqarpoq, taamaammat piffissaq sivikitsoq atorlugu ilinniakkamik aallartittussarsiorsimavugut, tamanna aamma qinnuteqartut amerlassusaanni ersippoq. Aallartissaagut, naak siullermeerlutik aallartittussat ikikkaluartut. Kisianni nalinginnaasumik ilinniakkat nutaajusut taamaattarput aallartinnissarpullu pingaarnerpaavoq, Nina Qvistgaard oqarpoq.
Akuerisaanissamut periarfissaq nutaaq
Ilinniakkami nutaami qassit ilinniartunngussanersut ilinniakkami pisortap suli kisitsisaatiginngilai.
- Qaffasinnerusumik ilinniagaqarfinnut aasaanerani qinnuteqarfissaq nutaaq takkuttarmat qinnuteqarneq ajornakusuulaarsinnaasarpoq. Taamaattumik qinnuteqartussat ilinniakkamik nutaamik misileerusuttut juulip 26-aniit ilimanaatilimmik inissaqartitsisoqalerpat qinnuteqarnissaminnut nutaamik periarfissinneqassapput, 8. august qinnuteqarnissamut killigitinneqarpoq.
- Taava arlaat ukioq manna qinnuteqanngitsoorsimanini nikallungassutigippagu qinnuteqarnissamut ilimanartumik nutaamik periarfissaqassaaq. Aamma soorunami DTU-mi qinnuteqarnermut ilitsersuisut attaviginissaannut tikilluaqqusaapput uunga optagelse@adm.dtu.dk, tassunga tunngasumik apeqqutissaqarunik, Nina Qvistgaard oqaluttuarpoq.
Qinnuteqarfissat arlallit ingerlasarmata Nina Qvistgaardip Issittumi Teknologimi ingeniørinngorniarfimmi aammattaaq Sisimiuni ingerlanneqartartumi ilinnialertussat qassiussanersut eqqoriarsinnaanngilai.
Ukiuni arlalinni piareersarneq
Ilinniagaq nutaaq Issumi aalisarnerup iluani ingeniørinngorniarfik ukiuni arlalinni Pinngortitaleriffik peqatigalugu piareersarluareerlutik aallartippaat, Namminersorlutik Oqartussanit tapiiffigitillutik Kalaallit Nunaannilu aalisarnikkut inuutissarsiornermut qanimut attaveqarlutik.
- Issittumi aalisarnerup iluani ingeniørinngorniarfimmi ilinniartut aalisarnermi aamma aalisakkanik qalerualinnillu suliaqarnermi naleqartitani immikkoortut tamaasa pillugit ilinniartinneqassapput. Tassa ataqatigiiaani tamani, uumassusillit tunisassiarineqartarneraniit, piniarnermiit nerisassanut ingerlatsinerlu, aamma piujuartitsineq nutaaliornerlu qitiutinneqassapput. Ornigulluni suliaqartoqartassaaq, suliffimmik misiliisoqassaaq nalinginnaasumillu atuartoqassaaq suliniutiliorlutillu, ilinniartut aalisakkanut tunngasut timitalissavaat atuagarsornikkullu ilinniarlutik, Nina Qvistgaard oqaluttuarpoq.