Sisimiut juullerpalaarnerussaaq
Ukioq manna Sisimiuni innuttaasut aqqusinikkoornerminni juullerpalaaq misigisartussanngorpaat. Nammineq kajumissutsiminnik suliniuteqartut suliniuteqarnerisigummi, illoqarfik qullernik juullerpalaartunik pinnersarneqarpoq.
Juulli nuannersuullunilu killitsinartarpoq. Juullerpaluttut qullersuarnut nivinngarneqartalernerisigut Sisimiut illoqarfiata qiterpasissortaa ukiut tamaasa juullerpalaarnerusalissaaq.
Tassani Sarfalerisut ApS-imit Maannguaq Philip Lauritzen, suliniummik aallartitsisuuvoq, Qeqqata Kommunia allappoq.
Suliniut suleqatigiissitsinermik pilersitsisimavoq.
- Unammillertitsinnit ikioqqullunga nalinginnaasumik sianerfigineq ajorpakka, matumanili juullerpalaartut nivinngaassornissaanni Kaataq El ikiorsinnaaneraatigut aperivara. Qujanartumik ikiorusuppaatigut, Maannguaq Lauritzen oqarpoq.
Aappaagu suliap aallartiaarnerunissaa neriuutigineqarpoq, taamaattoq juullerpaluttunik ikkussuisoqarsimanera nuannaarutigineqarpoq.
- Suliniut una annertusineqassappat, juullerpalaartunillu assigiinnginnerusunik toqqartuisinnaaniassagatta, neriuppugut aappaagu siusissukkut aallartissinnaassalluta, oqarpoq.