Sisimiut eqqaanni aqqartartoq prammiuvoq
Sisimiuni innuttaasut arlallit marlunngormat Sisimiut avataanni aqqartartuusinnaasumik takusaqarsoripput. Politiit apersuinerisa aamma Issittumi Sakkutooqarfiup misissuinerisa kingorna, prammi takuneqarsimasoq paasinarsivoq.
Sisimiut avataanni takusaq imaatigut ingerlaartoq nalunaarutigineqartoq, politiit aamma Issittumi Sakkutooqarfik pingasunngormalli misissuiffigilerpaat. Issittumi Sakkutooqarfiup tusagassiinermut pisortaata, Torben Kjeldsenip Sermitsiaq.AG-mut uppernarsarpaa.
Innuttaasut arlallit aqqartartuusinnaasumik marlunngormat takusaqarsimallutik isumaqarput.
- Misissuinitsinni aqqartartoqarsimaneranik takussutissaqanngilaq, Issittumi Sakkutooqarfimmut tusagassiinermut pisortaq, Torben Kjeldsen oqaluttuarpoq.
Angallat prammimik kalittoq
Tassami politiit killisiuinerisa aamma Issittumi Sakkutooqarfiup misissuinerisa takutippaat, umiatsiaq takisuumik kalittaaserluni prammimik kalittoq takuneqarsimasoq.
Issittumi Sakkutooqarfiup umiarsuaa alapernaarsuut Ejner Mikkelsen piffimmi Sisimiut eqqaani ilaatigut alapernaakkiartorpoq.
Ilisimannittut ilaata takusaminik assilisaa aamma Illersornissaqarfiup paasiniaasartuinut misissugassanngorlugu nassiunneqartoq, KNR ippassaq sisamanngornermi oqaluttuarpoq.