Sisimiut eqqaani ikuallattoq qaminneqarpoq

Sisimiut avannaata kangiani Kangerluarsuk Tulliup qinnguani nunap ikuallannera qaminneqarpoq.

- Innersuussutigineqartorlu Sisimiut Kangerlussuullu akornanni pisuttut aqqutaata, Arctic Circle Trailip, ilaani Kangerluarsuk Tullemiit Eqalugaarniarfimmut – Nerumaq aqqutigalugu – pisuffigineqassanngitsoq, maanna atorunnaarsinneqarpoq, Qeqqata Kommuniani Qatserisartuni immikkoortortami aqutsisoq, Poul Olsen taama nalunaaruteqarpoq.

Qatserisartut sapaatip akunnera sinnerlugu nunap ikuallanneranik qamisaapput. Qamisaaniarneq unammillernartoqarsimavoq, ikuallannerup pujuliungaatsiarnera pissutigalugu. Air Greenlandillu qulimiguujutaa ataaseq qamisaanermi ikiuussimavoq.

Pujoorisoqarnerata nalaani ikuallanneq aallartippoq. Pujoorivik nakkutigineqarluaraluartoq, taamaattoq nuna ikuallalerami sukkasuumik siaruaassimavoq, nunap panernerujussua pissutigalugu. Ikuallannerup pujuliorujussuarnera pissutigalugu nunakkut pissuttut aqqutikkut allakkut ingerlassasut innersuussutigineqarpoq.

Innersuussulli maanna atorunnaartoq, nalunaarutigineqarpoq.