Sisimiut Batmaniat ukiuni 40-ni suliaqarsimanera pillugu nersorniarneqartoq

Sisimiuni hr. Batman, Niels Nielsen, ukiuni 40-ni nerriveeqqamik arsaararnermi suliaqarsimanera pillugu, borgmesterip Malik Berthelsenip nersorniarpaa.

2018-imi 289-init ikinnerunngitsut ujammit Sisimiunut angerlaanneqarput.

Ujaminnassimasut nersorneqarlutik decembarip 28-ani ujamminik agguaassiffigineqarput, soorluttaaq ukiumi sungiusaallammaat, ukiumi angusagissaarnerpaaq, ukiumi piukkunnaatilik kiisalu ukiumi siulersuisullammaat suaarutigineqarlutut.

Unnummi nersorneqartut Qeqqata Kommuniani Borgmesterimit Malik Berthelsenimit kiisalu Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliami ilaasortanit Evelyn Frederiksenimit aamma Frederik Olsenimit ilisaritinneqarput, kommune tusagassiutinut nalunaaruteqarluni ilisimatitsivoq.

Ukiuni 40-ni suliaqarsimasoq nersualaarneqarpoq

Nersornaatinik agguaassinerup saniatigut, Niels Nielsen ukiuni 40-ni Nerrivimmi arsaarartartunut Bat-98-imut sungiusaasuusimaneranut siulersuisunilu ilaasortaasimaneranut borgmesterimit akissarsitinneqarpoq.

- Niels, ukiorpassuarni sungiusaasuullutillu peqatigiiffimmi ilaasortaasimavutit. Tunniusimanerit qasusuillutillu suliaqarsimanerit tupinnarluinnartuuvoq. Ukiut ingerlanerini meeqqat inuusuttullu qanoq amerlatigisut, qanorlu pitsaatigisumik sungiusartarsimaneritit takorloorsinnaavara. Tamanna ilaatigut meeqqat kiisalu nammineq qitornavit, assersuutigalugu Arctic Winter Games-ini ujamminik pissarsisarsimanerisigut takuneqarsinnaavoq, taama Malik Berthelsen oqalugiaammini ilaatigut oqaaseqarpoq.

Ilaatigut nipilersortoqarneratigut, meeqqanik kalattoortoqarneratigut kiisalu erinarsoqatigiit Malikkut erinarsornerisigut unnuk malunnartinneqarpoq.

Pisiffik Brugsenilu nersornaaserneqartunut gavekortimik aamma tunisipput.

Uku timersornermik nersornaasitinneqarput:

Timersullammak 2018: S.A.K assammik arsartartut niviarsiaqqat U15

Piukkunnaatilik 2018: Sisimiut taekwon-Do, meeqqat.

Siulersuisuullammaat 2018: SSP ujakkaartartut.

Sungiusaasuullammaat 2018: S.A.K U13 isikkamik arsartartunut sungiusaasut Hans Ole Kristiansen aamma Jens Karlsen.

Powered by Labrador CMS