Sisimiuniit Qaqortumiillu aallartoqarsinnaajunnaarpoq
Coronavirusimik tunillatsissimasunut qanillivallaarsimasinnaasut suli misissorneqarput. Qaqortumiit Sisimiuniillu ataasinngorneq ilanngullugu aallartoqarsinnaajunnaarpoq. Killilersuutit sivitsorneqarput.
Qaqortumi arfinillit aamma Sisimiuni arfinillit maanna tunillatsissimasutut nalunaarsorneqarsimapput. Illoqarfinni taakkunani tunillaassuuttoqalernissaa aarlerinaateqartutut nalilerneqarpoq.
- Qaqortumiit Sisimiuniillu aallarsinnaanerit ataasinngorneq ilanngullugu unitsinneqarput. Nappaalanersuaqarneranut ataatsimiititaliap innersuussutaa aalajangernermi malipparput. Tassa imaappoq Sisimiuniit Qaqortumiillu aallartoqarsinnaajunnaarallarpoq, Múte B. Egede tusagassiortunik katersortitsinermi oqarpoq.
Angalasinnaanermut killilersuutinik atuutsitsilernermut tunngavilersuutigineqarpoq Sisimiuni aamma Qaqortumi aqunneqanngitsumik tunillaassuuttoqarnera aarleqqutigineqarmat, tunillaassuunnerullu nunatta sinneranut siaruannginnissaa anguniarneqarluni.
Innuttaasut Qaqortumiit Narsarsuatsigoorlutik, aamma Sisimiuniit Kangerlussuatsigoorlutik Danmarkimut angalasussat suli aallarsinnaasut, peqqissutsimut Naalakkersuisup Kiista L. Fenckerip erseqqissaatigaa.
Misissuisarfiit artorsartut
Tusagassiortunik katersortitsinerup nalaani oqaatigineqarpoq tunillatsissimasunut qanillivallaarsimasut akornanni allanik tunillatsissimasoqarnersoq suli paasineqanngitsoq. Misissortereersimasut arlallit akissutisinissaminnik suli utaqqipput, misissuisitsinerit angummassinnaanngimmata.
Pingaartumik Qaqortumi misissugarisat akissutisipallannissaat ajornakusoorpoq.
- Maannamut tunillatsissimasunut qanillivallaarsimasinnaasut tamakkerlugit misissorlugillu akissutisisinnaasimanngilagut. Tamassumunnga pissutaavoq misissuiviup naammassisinnaasai sipporlugit misissugassaqarmat, aammalu angallanniarnikkut unammillernartoqarmat, nakorsaaneq Henrik L. Hansen oqaluttuarpoq.
Nunatsinnut angalasussanut misissuisarneq allanngorpoq
Nuna tamakkerlugu killilersuutit marlunngormat atuutsinneqalersut ataasinngorneq ilanngullugu atuutiinnassapput.
Killilersuutit inuillu katersuussinnaanerannut amerlanerpaamik 20-nik killiliinerup, kiisalu illoqarfinnik marlunnik matusinerup saniatigut, Danmarkimiit Nunatsinnut angalasussanut malittarisassanik Naalakkersuisut nutaanik saqqummiussipput.
- Danmarkimiit nunatsinnut aallannginnermi coronavirusimut PCR atorlugu misissortinnerup inernera aallalernermit akunnernik 48-nit nutaannginnerussanngilaq. Malittarisassaq nutaaq ataasinngorneq 19. juli aallarnerfigalugu atuutilissaaq, Kiista Fencker oqarpoq.
Ullormi angalaffissami tunillatsissimanermut ersiuteqarsimagaanni, billitsip allanngortissinnaanissaanut isumaqatigiissusiussallutik Naalakkerusisut maanna misissuipput. Tamanna suli inissivinngitsoq, misissorneqartorli peqqissutsimut naalakkersuisoq ilisimatitsivoq.