Sisimiuni tunillatsissimasut marluk nutaat paasineqarput
Coronavirusimik tunillatsissimasut pillugit Nunatta nakorsaaneqarfiata kisitsisaatini nutarterpai. Sisimiuni tunillatsissimasut marluk nutaat paasineqarsimapput.
Annonse
Ulloq unnuarlu ataatsip ingerlanerani kingullermi tunillatsissimasut marluk nutaat paasineqarput. Tunillatsissimasut Sisimiuniipput. Sisimiuni suli tuniluuttoqarpoq.
Nunatta nakorsaaneqarfiata kisitsisaatai nutaat taama takussutissiipput.
Inuit pingasut peqqissisimasutut nalunaarutigineqarsimapput. Nunatsinni tunillatsissimasut tunillaasinnaasut maanna 40-pput.
Naalakkersuisut tallimanngornermi tusagassiortunik katersortitsinerminni killilersuutit Sisimiuni kisimi oktoberip 31-ata tungaanut atuutsinneqarallassasut nalunaarutigaat. Illoqarfimmi tunillaassuuttoqarnera tamassumani tunngavilersuutigineqarpoq. Illoqarfinni allani tunillaassuunneq killilersinnaasutut nalilerneqarsimavoq.