Sisimiuni tunillaassuunneq annikilliartorpasilertoq
Sisimiuni ulloq unnuarlu ataatsip ingerlanerani tunillatsissimasut arfinillit paasineqarput. Tunillatsissimasut amerlassusaat aallaavigalugit, isumalluarnartoqalaarsinnaasoq, nakorsaaneq tusagassiorfinnut nalunaarummi oqaaseqarpoq. Nuummili tunillaassuuttoqalersinnaaneranut aarlerinaat annertusiallappoq.
Sisimiuni coronavirus sapaatip akunnerani tunillaassuutingaatsiareertorlu, ulloq unnuarlu ataatsip ingerlanerani kingullermi tunillatsittut arfinillit paasineqarput. Tamanna pitsaasutut nalilerneqarpoq, isumalluarnalaarsinnaasutullu isigineqartoq, nakorsaaneq tusagassiorfinnut nalunaaruteqarluni oqarpoq.
- Inuit misissortittut amerlangaatsiarmata, misissuinerit inerneri tuniluunnerup annikilliartorneratut isigisinnaavagut, nunatta nakorsaanera Henrik L. Hansen tusagassiorfinnut nalunaarummi oqarpoq.
Tunillaassuunnerulli annikillinera tuniluunnerup qaangiunneranik isumaqanngitsoq, erseqqissarneqarpoq.
Innuttaasut affai misissorneqarput
Sisimiuni tunillaassuunneq 3. august aallartimmalli katillugit misissugassat 3.448-it tiguneqarsimapput, innuttaasullu 3.052-it misissorneqarsimallutik. Tassa illoqarfimmi innuttaasut 54 procentii misissorneqarsimalereerput.
- Taakkunannga 74-it Covid-19-imik tunillatsissimasut paasineqarpoq, tassalu misissukkat 2,4%-iinik amerlassuseqarlutik. Misissukkat amerlassusii eqarsaatigalugit tunillatsissimasut amerlapput, namminersorlutik oqartussat tusagassiorfinnut nalunaaruteqarlutik ilisimatitsipput.
Suli mianersortoqartariaqarpoq
Isumalluarnartoqarsinnaagaluartoq, taamaattoq tunillatsissimasut amerlassusaat innuttaasunut sanilliullugu annertusut, nakorsaaneqarfiup nalilerpaa. Sisimiuni ullut arfineq-marluk ingerlaneranni tunillatsissimasut 53-it paasineqarput. Tamanna isumaqarpoq inuit 100.000-iugaangata 943-t tunillatsissimanerisa naligaa, tamannalu suli tunillatsissimasut amerlasoorujussuunerinut takussutissaavoq.
- Misissortinnissamut kajumissuseq annertusimavoq, kisiannili suli illoqarfimmi suminngaanneerfiinik ilisimaneqanngitsumik tuniluuttoqarpoq. Tunillatsissimasut, suminngaanneerfiinik ilisimanngisagut nassaarisagut suli amerliartorput. Taamaattumik inuit tamarmik qanillinaveersaarnissaat katerittunullu ornigunnaveersaarnissaat, aammalu assamminnik eqqiluisaartitsilluarnissaat inassutigaarput, Henrik L. Hansen oqarpoq.
Nuummi aarlerinaat annertunerulerpoq
Sisimiuni paasineqartut arfinillit saniatigut Kommuneqarfik Sermersuumi sisamat aamma paasineqarput. Nuummi tunillaassuuttoqarnissaanut aarlerinaat annertunerulersutut nalilerneqarpoq.
Nuummi inuk illoqarfimmi sullissiviit ilaanni najugalik Covid-19-imik tunillatsissimasoq nassaarineqarpoq. Pineqartoq Covid-19-imut ersiuteqarnini pissutigalugu misissortissimavoq. Tunillatsiffia suminngaanneernersoq ilisimaneqanngilaq.
- Sullissivimmi najugallit amerlanersaat kapuinermi naammassinnissimapput, taamaattumillu annertunerusumik tuniluuttoqalernissaa killeqartutut isigineqarpoq. Sullissivimmi sulisorpassuit najugallillu inuiaqatigiinni amerlasuunut attaveqartarput. Taamaattumik Nuummi tuniluuttoqarnerata annertusinissaa ilimanaateqaqqilerpoq, ilisimatitsissutigineqarpoq.