Skip to main content

Sisimiuni tatsip qaavatigut sukkanniunneq

Unammineq immikkuullarissoq sapaatiuppat Sisimiuni ingerlanneqassaaq. Qamuteralannimmi tatsimi sukkanniuttoqassaaq.

Arlallit immaqa eqqarsartarput ukiukkuinnaq qamuteralattoqarsinnaasoq.

Taamaakkaluartoq Sisimiuni innuttaasut sapaammi qamuteralannik sukkanniuttoqalerpat isiginnaariarsinnaassapput. Nunatsinni watercross-mik sukkanniunnerit siullersaat Nalunnguarfiup tasiani, kultur-kkut illorsuup Taseralik-p eqqaani ingerlanneqassaaq.

Erngup qaatigoorluni qamuteralannik sukkanniuttarneq, watercross, Sverige-mi, Norge-mi, Canada-mi USA-milu nuannarineqartorujussuuvoq.

Peqataasussat quliusut

Qamuteralaatillit peqatigiiffiata, Qamuteralaat, aaqqissuussaq ingerlataraa, oqaatigineqarporlu unamminermi peqataasussat quliusut. Sisimiuneersut arfineq-pingasut, Maniitsumeersullu marluk.

Unammineq nuannersorujussuussaaq, amerlasuut isiginnaariarnissaat naatsorsuutigaarput, qamuteralaatillit peqatigiiffiata, 'Qamuteralaat', siulittaasua Maannguaq Lauritzen Sermitsiaq.AG-mut taama oqarpoq.

Piumasaqaatit sakkortuut

Taanna oqarpoq unammersuarnissamut piareersimallutik.

- Peqataasussanut sukannersunik piumasaqaateqarpugut. Tatsimut uuliakoortoqassanngilaq, uulia immmikkuullarissoq kisimi atorneqassaaq, peqataasussallu tamarmik puttaqummik aaqanngitsumik atisaqassapput. Isumannaallisaaneq pinngortitattalu mingutsinneqannginnissaa pingaartipparput, Maannguaq Lauritzen oqaluttuarpoq, ilisimatitsissutigalugulu Qeqqata Kommunianut Qatserisartoqarfimmullu unammisitsisinnaanermut akuersissummik tunineqareersimallutik.

Soqutigineqarluartoq

Unamminerup sapaammi ingerlanneqarnissaa nalaatsornerinnaanngilaq.

- Umiarsuaq takornariartaat tikittussaavoq, ilisimatinneqareerpullu qamuteralannik sukkanniuttoqartussaasoq. Neriuutigaarpullu unammersuarneq nittarsaanneqarumaartoq.

Qamuteralannik sukkanniunnissaq illoqarfimmiunit soqutigineqarluartoq Maannguaq Lauritzen-p oqaatigaa.

- Unammineq qamuteralannermik nuannarisalinninngaanniit takornarianiillu soqutigineqartorujuunissaa naatsorsuutigaarput. Unammineq pissanganartumik ingerlanneqartussaavoq, peqataasummi kivissanngikkunik uninngiivillutik ingerlasariaqarput. Taamaattumik unammineq isiginnaarlugu pissanganartorujussuussaaq, neriuutigaarpullu isiginnaartuniit tingulluarneqarumaartoq, Maannguaq Lauritzen taama oqarpoq.

Watercross-mik unammineq sapaammi nal. 14.00-mit 18.00-mut ingerlanneqassaaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER