Sisimiuni takornariartitsisut umiarsualivittaaq iluaraat
Nunatsinni illoqarfiit annersaasa tulliani umiarsuit takornariartaatit aatsaat taama amerlatiginerannut umiarsualivik nutaaq pissutaasoq Qeqqani inuussutissarsiornermut siunnersuisooqatigiit nalunaarput
Sisimiut umiarsualiviata ukiuni amerlasuuni kingullerni unammillernartorisuaannarnikuuvaa, umiarsuit tikittartut amerliartornerini inissaaleqitsitsineq. Kisiannili umarsualiviup allineratigut, umiarsuanik takornariatsitsinerup 2013-mi aallartinnerani, takornariartitsisut ullormiit siullermiit pitsanngoriataasumik misigisaqarsimapput.
Takornarissammi nunami ulorianannginnerusumut ikaasinnaalersimapput containerinut, truckinut , kraninut assigisaanullu akulerusimanatik, minnerunngitsumik illoqarfiup tungaanut ingerlanerminni pissanganartumik aqqusaagassaqalerputtaaq, soorlu qajartortatut klubbiat, umiatsiaararsortut umiatsialiviat, kiisalu kusarnartuliortut sannaviat.
- Takornarissat arlaanut ingerlaqqinniartut pitsaanerusumik aqusinnaalerpavut, bussit takornarissanik ingerlatsisut umiarsuup killerpiaanut unissinnaalerput, tamanna pitsaaqutaavoq ajunngitsoq, takornarissammi ilarpassui utoqqasaajullutik pitsorluttuusarmata, taamatut Ivik Knudsen-Ostermann Greenland Cruises-inersoq oqaluttuarpoq.
Pisianiarfiit pitsaanerusumik aamma kinguneqartitsipput soorlu ilaatigut Nord Cafee & Art illoqarfiup qanganisartaaniittoq:
- Umiarsuarsuit amerlanerusut talissinnaalernerini ikaartaatinik ikaassuisarneq pingitsoortinneqarsinnaalerpoq, taamalilluni ilaasut umiarsuamut ajornannginnerusumik ikaarsinnaanngorlugit. Umiarsuup tikinnerani maluginiarparput takornarissat amerlanerusut nunamut ikaartalersut, kiisalu nunamiittarnerat sivisunerulersoq, ilaatigummi takornarissat arlallit ataasiaannaratik nunamut ikaartalersimasut maluginiarparput, aningaasallu amerlanerusut atorneqartalerlutik.
Blue Waterip Sisimiumi immikkortuani pisortaq Frank Mieth umiarsuarnit takornariataatinit nersuarlaaneqarluni nalunaarfigineqartarsimavoq, tassalu sullinneqarnerup pitsaasusaa qaffasiinnanngilaq, oqaaserli immikkuullarissumik sullineqarneq atorneqalersimalluni.
- Naammagisimaarinninneq tamanna pisinnaanngilaq, ajunngitsunik pitsaasunillu atugassaqartinneqanngikkaanni, soorlu inissaqarluarneq, sillimaniarneq, tikikkuminassuseq, sullinneqarnissamullu atortut, soorlu imeq, olie, il.il. ilimagilluinnarpara, pitsaasumik umiarsualivittaarnitsigut amerlanerujussuarnik nunamiit sullissisinnaalersugut. Umiarsuaatileqatigiinniillu nalunaarfigineqartuarpugut umiarsualivittaarput pitsaalluinnartoq taamatut Sisimiuni Blue Waterip immikkoortuani pisortaq Frank Mieth oqarpoq.
Sisimiuni malugisimavarput, takornariatitsinerup aallartinnerani nalunaarutigineqaraluartunit 10% angullugu amerlanerusunik umiarsuarnit takornariartaatinik tikinneqarnerusimalluta, tamatumunngalu umiarsualivik nutaaq pisooqataanngitsuunngilaq.