takornariaqarneq

Sisimiuni takornarialerisut: Paatsuuinermik tunngaveqarluni tulleriiaarineq

Nunatta takornariaqarnermut siunnersuisoqatigiivisa Visit Greenlandip missingersuutaasa 12 procentit sinnerlugit ikilineqarnerat Sisimiuni takornariaqarnermik ingerlatsisut sakkortuumik isornartorsiorpaat

Hundeslæde, Sisimiut
– Visit Greenlandimut missingersuutit ikilisinneqarnerat paatsuuerujussuarluni tulleriiaarineruvoq. Aningaasarsiorneq aningaasanik akeqarpoq, nunallu nittarsaanneqarnissaanut Naalakkersuisut aningaasanik tunniussisariaqarput ikilisaanatik, Bo Ling, Sirius Greenlandimeersoq oqarpoq

Ajorluinnartutut isigineqartarpoq ingerlatsiviit isertitaqanngileraangamik atuisukilligaangamillu ussassaarinermut missingersuutitigut sipaaruteqartarnerat. Taamatorpiarli iliorpoq Aningaasaqarnermut Naalakkersuisoq. Sisimiuni takornariaqarnermik ingerlatsisut malunnaatillit arlallit tusagassiorfinnut nalunaarutikkut taamatut oqarput, tamakkualu tassaapput Anita Høegh pisiniarfimmik Qiviut pigisalik, Hotel Sisimiut pisortaa Anette Lings, Igloo Mountain-imi siulersuisuni siulittaasoq Larseeraq Skifte aamma Bo Lings, Sirius Greenland-imik piginnittoq.

– Visit Greenland suliaminik ingerlatsinissaminut aningaasanik kanngunaannartumik ikittuararsuarnik tunineqarpoq. Pingaartumik eqqarsaatigissagaanni takornariaqarnermik ingerlatsisut ilaasunut akitsuutitigut isertitat iluaqutigisimanngisaannarmatigit. Maanna akitsuutit apparneqarmata allatut isikkoqanngilaq isertitat, siusinnerusukkut inuussutissarsiummut iluaqutaasarsimanngitsut, allannguutaat takornariaqarnermik ingerlatsisut toqqaannartumik akilissagaat, Qiviut pisortaa Anita Høegh oqarpoq, taassumalu umiarsuarnik takornariartaatinik takornariat isumalluutigai, Sisimiuni Nuummilu pisiniarfimminut takkuttartut.

– Ajornartorsiornerit nalaanni politikkikkut pitsaasumik aqutsisoqarnissaa pisariaqartinneqarpoq avammut tuniniaavinnik siuariartornissamut piviusumik isiginnillutik pingaartitsisunik. Kalaallit Nunaanni suliffissaaleqinerujussuup qaangerniarnissaanut takornariaqarnermik ingerlatsiviit aqqutissat ilagaat, tamakkua maannakkorpiaq suliffiummata. Takornariat nunami tikeraakkaminni toqqaannartumik isertitanik pilersitsisarput. Sinerissami innuttaasut akornanni siuariartortitsipput suliffinnillu amerlanerusunik pilersitsillutik, nunat tamalaat selskabersuinit isertitat qullersanut ingerlatinneqartartut, Hotel Sisimiut pisortaa Anette Grønkjær Lings oqarpoq.

Igloo Mountain-imi siulersuisuni siulittaasoq Laarseeraq Skifte aningaasat sumit tiguneqarnissaannik siunnersuutissaqarpoq.

– Aningaasat uuliasiornermit aatsitassarsiornermillu tigusigit. Takorniaqarnermut aningaasat amerlanerusut ullumikkut sumiiffinni aningaasarsiornermut tunngaviliissapput, ukiut 20-30-t qaangiuppata pinnani, taanna tikkuaavoq.

Ullumikkut takornariaqarneq ukiumut 400.000 koruuninik pissarsissutaasarpoq, inuussutissarsiullu nunarsuarmi tamarmi siuariartorpoq. Kalaallit Nunaat siuariarrtornermut peqataassappat Sisimiuni takornariaqarnermik ingerlatsisut isumaqarput Visit Greenlandip ingerlatsivittut ilisimasaqarluartunit ingerlanneqarnissaa aatsaat taama pisariaqartigisoq, anguniagalimmik eqqorluinnartumillu aammalu kulturi pinngortitarlu ataqqillugit Kalaallit Nunaannik anguniagalimmik nunatut takornariartarfittut nittarsaasusamik.

Visit Greenland Kalaallit Nunaannik nittarsaallaqqissorujussuuvoq, tdamannalu kalaallit avammut tuniniaanernik inuussutissarsiutaannut iluaqutaavoq, Sisimiuni takornariaqarnermik ingerlatsisut naliliiput.

– Takornarianik unammillerneq annertoqaaq, aamma tunisassiani Kalaallit Nunaanni neqeroorutigineqartuni. Visit Greenlandip qulakkeerpaa Kalaallit Nunaat takornariaqarnermillu ingerlatsiviit avatitsinnit ilisimaneqarnerat, Bo Lings, Sirius Greenlandimik piginnittoq oqarpoq.

– Visit Greenlandimut missingersuutit ikilisinneqarnerat paatsuuerujussuarluni tulleriiaarineruvoq. Aningaasarsiorneq aningaasanik akeqarpoq, nunallu nittarsaanneqarnissaanut Naalakkersuisut aningaasanik tunniussisariaqarput ikilisaanatik, Bo Ling tusagassiorfinnut nalunaarut naapertorlugu oqarpoq.

Sisimiuni takornariaqarnermik ingerlatsiviit tassaapput Qiviut, Sirius Greenland, Sømandshjemmi, Greenland Cruises, Qimmussertartut peqatigiiffiat Qimusseq, Igloo Mountainn aamma Hotel Sisimiut/76ᵒN.

Powered by Labrador CMS