Sisimiuni ski festival ingerlanneqartoq

Lârsêraq Ski Festival Sisimiuni ingerlanneqartussaq tallimanngornermi 24. februar aallartippoq. Festivalimi pinnguarneq, sungiusarneq ataqatigiinnerlu qitiutinneqassapput.

Lârsêraq Ski Festival ukioq manna Sisimiuni ingerlanneqartoq pinnguarnermik, sungiusarnermik ataqatigiinnermillu qitiutitsilluni ingerlanneqarpoq. Ski festival ulluni 24.-27. februar ingerlanneqassaaq, Sisimiuni Sisorartartut Peqatigiiffiat, SSP, aaqqissuisooqataalluni.

Ujakkaartartut ataatsimiititaliaata festival siorna pilersippaat, Arctic Circle Racemik aallarniisoq Lârsêraq Skifte eqqaaniarlugu. Ski festival siorna ingerlanneqaqqaarpoq, Nuummi. Ukioq mannalu Skiftep illoqarfigisimasaani ingerlanneqarluni.

Isumassarsiorfittut ataqatigiinnerulernermullu atorneqassasoq

Pinnguarnerup sungiusarnerullu saniatigut sisorartartoq Aqqaluartaa Olsen sammisassaqartitsivoq. Taanna Norgemi najugaqarpoq, sisorarnermillu aallutaqartuulluni.

- Klubbit akornanni nammineq piumassutsimik sulisunik pissarsiornerput unammillernartuusarpoq – ilaatigut sungiusaasoqarnikkut. Taamaammat Aqqaluartaa Olsen peqataasunik suliaqartitsissooq klubbinut sungiusaanermut pilersaarutinik sungiusaallunilu atungassanik taamaasilluni pilersitsisoqassalluni, ujakkaartartut ataatsimiititaliaani siulittaasoq Marie Fleischer oqarpoq nangillunilu:

- Anguniangaavoq sungiusaasuuneq ajornannginnerulernissaa.

Lârsêraq ski festival ukiut tamaasa ingerlanneqartassaaq, illoqarfiit tulleriiaarlugit aaqqissuunneqartassalluni. Sisorartartut aaqqissuussinissaminnut taamaasillutik periarfissinneqassallutik. Festivali pilerisunnerulertitsissaaq, ataqatigiinnerulersitsissaaq, peqataatitsissaaq peqataasullu piginnaasaannik ineriartortitsinermik siunertaqarluni.

Powered by Labrador CMS